Վանաձորում ծառեր են հատել. Էդմոն Մարուքյանը հանցագործության մասին հաղորդում է ներկայացրել դատախազություն (տեսանյութ)

«Լուսավոր Հայաստան» կուսակցության Խորհրդի նախագահ, ՀՀ ԱԺ պատգամավոր Էդմոն Մարուքյանի հանցագործության մասին հաղորդումը ՀՀ գլխավոր դատախազի պաշտոնակատար Արմեն Հարությունյանին.

Հարգելի՛ պարոն Հարությունյան,

Այսօր Վանաձորի Ազատամարտիկների պուրակի սկզբնամասում ապօրինի հատման են ենթարկվել արծաթափայլ հինգ եղևնի:

Համաձայն Հայաստանի Հանրապետության քաղաքացիական օրենսգրքի 134-րդ հոդվածի՝ բազմամյա տնկիները համարվում են անշարժ գույք:

Համաձայն Հայաստանի Հանրապետության հողային օրենսգրքի 56-րդ հոդվածի 1-ին մասի՝ համայնքների սեփականությանն են պատկանում տվյալ համայնքի սահմանագծի ներսում գտնվող հողերը, բացառությամբ պետությանը, քաղաքացիներին, իրավաբանական անձանց և սեփականության այլ սուբյեկտներին պատկանող հողերի:

Հետևաբար, վերոնշյալ տնկիները, որպես անշարժ գույք, պատկանել են Վանաձոր համայնքին, այսինքն՝ հանդիսացել են համայնքային սեփականություն: Ըստ այդմ՝ ապօրինի ծառահատմամբ խախտվել են համայնքի իրավունքները:

Ըստ Հայաստանի Հանրապետության քրեական օրենսգրքի 296-րդ հոդվածի՝ անտառային ֆոնդի տարածքներում, ինչպես նաև անտառային ֆոնդի մեջ չմտնող տարածքներում կամ հատումներն արգելված ծառերը, թփերը հատելըկամ ոչնչացնելը (…) եթե այդ գործողություններն առնվազն զգալի վնաս են պատճառել, համարվում են հանցագործություն:

Որպես Վանաձոր համայնքի բնակիչ և նույն համայնքից ընտրված պատգամավոր՝ խնդրում եմ օրենքով սահմանված կարգով ընթացք տալ հանցագործության մասին սույն հաղորդմանը, ինչպես նաև գործի հետագաընթացքի մասին տեղեկատվություն տրամադրել նաև ինձ:

17․08․2016 թ․
ՀՀ ԱԺ պատգամավոր,

ԼՀԿ Խորհրդի նախագահ Էդմոն Մարուքյան