Կտրուկ աճել են պետական իշխանության, ծառայության և կառավարման կարգի դեմ ուղղված հանցագործությունները

Հայաստանի Հանրապետությունում այս տարվա առաջին կիսամյակի ընթացքում նվազել են կեղծ փողեր կամ արժեթղթեր պատրաստելու, պահելու կամ իրացնելու դեպքերը: Եթե 2015թ. առաջին վեց ամսում գրանցվել է այդպիսի 174 դեպք, ապա այս տարվա հունվար-հունիսին՝ 100 դեպք: Լուրեր.com-ը ՀՀ ազգային վիճակագրական ծառայությունից տեղեկացավ նաև, որ տնտեսական գործունեության դեմ ուղղված այլ հանցագործությունների գծով ևս, թեև փոքր, բայց նվազում է արձանագրվել. Նախորդ տարվա 1-ին կիսամյակի համեմատ (250 դեպք), դրանց քանակը 2016թ. համեմատելի ժամանակահատվածում նվազել է 11-ով ու կազմել 239 դեպք:

ԱՎԾ-ի այս և ստորև ներկայացվող տվյալները հիմնված են ՀՀ ոստիկանության ամփոփ տեղեկատվության վրա: Դրանց համաձայն, կտրուկ աճել են պետական իշխանության, ծառայության և կառավարման կարգի դեմ ուղղված հանցագործությունները. 2015թ. առաջին կիսամյակի 596-ի դիմաց այս տարվա նույն ժամանակահատվածում արձանագրվել է նմանաբնույթ 1345 դեպք, այսինքն՝ նշված բնույթի հանցագործություններն աճել են 749-ով:

Գրանցված աճը չի վերաբերում հանցատեսակների նույն խմբում գտնվող պաշտոնեական լիազորություններ չարաշահելուն և անցնելուն, որոնք 120-ից նվազել են 105-ի, կաշառք ստանալու, տալու, կաշառքի միջնորդության դեպքերին, որոնք պաշտոնապես գրանցված 50-ից նվազել են 31-ի: Իշխանության ներկայացուցչի նկատմամբ բռնություն գործադրելու դեպքերը 2015թ. առաջին կիսամյակի 25-ից այս տարվա հունվար-հունիսին 8-ով ավելի են (33 դեպք): Աճել է նաև պետական իշխանության, ծառայության և կառավարման կարգի դեմ ուղղված այլ հանցագործությունների թվաքանակը. եթե նախորդ տարվա հունվար-հունիսին գրանցվել է այդպիսի 401 հանցագործություն, ապա ս. թ. 1-ին կիսամյակում' 1176: