Կադաստրի աշխատակցին` պաշտոնեական անփութության համար

Հայաստանի Հանրապետության պետական համակարգում բազմաթիվ են այն պաշտոնատար անձինք, որոնք ծառայության նկատմամբ անբարեխիղճ կամ անփույթ վերաբերմունքի հետևանքով իրենց պարտականությունները չեն կատարում կամ կատարում են ոչ պատշաճ ու դրանով իսկ անզգուշությամբ էական վնաս պատճառում անձանց կամ կազմակերպությունների իրավունքներին ու օրինական շահերին:

Լինում են նաև դեպքեր, երբ նրանք այդպիսով էական վնաս են պատճառում հասարակության կամ պետության օրինական շահերին: Ցավոք, միշտ չէ, որ այդպիսի դեպքերը բացահայտվում են ու պատժվում մեղավորները, թեև դրանց բացահայտումն առանձնապես դժվար չէ: Դժվար է ասել, թե դրա պատճառը որն է՝ պետական համակարգի աշխատողներ են, չե՞ն ուզում նեղացնել, տվյալ հանցատեսակն այնքան էլ վտանգավոր չե՞ն համարում, թե՞ կա այլ պատճառ…

Պաշտոնեական անփութության սակավաթիվ դեպքերից մեկը, որի առնչությամբ հարուցված քրեական գործը Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը ստացել է այս տարվա մայիսի 12-ին, վերաբերվում է ՀՀ ԿԱ անշարժ գույքի կադաստրի պետական կոմիտեի աշխատակցին՝ նշված կոմիտեի համակարգում 2012 թվականից կազմակերպական-տնօրինչական և վարչատնտեսական գործառույթներ իրականացնող պաշտոնատար անձ հանդիսացող Գուրգեն Պողոսյանին: Քրեական գործի նախաքննությամբ պարզվել է, որ նա կատարել է հանցավոր արարք, որը նախատեսված է ՀՀ քրեական օրենսգրքի 315-րդ հոդվածի («Պաշտոնեական անփութությունը») 1-ին մասով: