Քրեական պատասխանատվության է կանչվել զինկոմիսարիատի` զորակոչիկների բժշկական ստուգում անցկացնող հանձնաժողովի անդամը

Անշուշտ, պետք է դրական գնահատել, որ քրեական պատասխանատվության են կանչվում նրանք, ովքեր այս կամ այն չափի գումարի դիմաց տարեկետում են տրամադրում կամ տարեկետման տրամադրում խոստանում այն զորակոչիկներին, որոնք չունեն առողջական այնպիսի խնդիր, որը հիմք է տարեկետում ստանալու համար:

Միաժամանակ հասկանալի է, որ բոլորը չէ, որ հայտնաբերվում են ու կանչվում քրեական պատասխանատվության, և նմանների պատժի անխուսափելիության ապահովման համար դեռ լրացուցիչ աշխատանք է պահանջվում իրավապահներից: Չենք բացառում, որ որոշ դեպքերում էլ իրավապահները չեն ցանկանում բացահայտել ու քրեական պատասխանատվության կանչել զինկոմիսարիատների զորակոչիկների բժշկական ստուգում անցկացնող հանձնաժողովների այդպիսի պաշտոնյաներին՝ իմանալով, թե որոշակի անձն ում տղան, որդին կամ, ասենք, եղբայրն է:

Ստորև ներկայացվող դեպքում բացահայտել ու քրեական պատասխանատվության են կանչել խոշոր չափի գումարի դիմաց տարեկետում խոստացած զինկոմիսարիատի զորակոչիկների բժշկական ստուգում անցկացնող հանձնաժողովի մի պաշտոնյայի, բայց անհասկանալի է, թե ինչո՞ւ խոշոր չափերով խարդախության համար, և ոչ թե՝ խոշոր չափերով կաշառք վերցնելու, որի դեպքում նախատեսված քրեական պատասխանատվությունն ավելի խիստ է. ազատազրկման պարագայում 2-5 տարվա փոխարեն, 4-10 տարի: Եթե գումարը վերցնողը չէր կարողանալու իր խոսքի տերը լինել, ապա մեղադրանքը ճիշտ է առաջադրվել, բայց չէ՞ր կարողանալու, այս խնդիրն օբյեկտիվ, անաչառ ու բազմակողմանի քննությամբ մինչև վերջ պարզվե՞լ է…

Ըստ մեղադրական եզրակացության, Դավիթ Գրիգորյանն ընդգրկված լինելով Գավառի զինկոմիսարիատի՝ զորակոչիկների բժշկական ստուգում անցկացնող հանձնաժողովի կազմում, ձմեռային զորակոչից տարկետում տրամադրելու հարցը լուծելու պատրվակով, իր պաշտոնական դիրքն օգտագործելով, զորակոչիկի հայր Արայիկ Գարգրցյանի վստահությունը չարաշահելով, նրանից ստացել է 611 370 դրամին համարժեք 1500 ԱՄՆ դոլար ու խարդախությամբ հափշտակել խոշոր չափի այդ գումարը:

Նույն քր. գործի շրջանակում մեղադրանք է առաջադրվել նաև Արայիկ Գարգրցյանին այն բանի համար, որ նա Գավառի զինկոմիսարիատի զորակոչիկների բժշկական ստուգում անցկացնող հանձնաժողովի անդամ Դ. Գրիգորյանին տվել է 1500 ԱՄՆ դոլար՝ իր որդի Ժորա Գարգրցյանի օգտին կաշառքի դիմաց զինվորական ծառայությունից տարկետման իրավունք վերապահող հետազոտման ակտ տալու համար:

Վերը նշված արարքների համար Դավիթ Գրիգորյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 1.1, 2-րդ և 5-րդ կետերի (խարդախությունը պաշտոնեական դիրքն օգտագործելով, խոշոր չափերով և կաշառք ստանալու պատրվակով), իսկ Արայիկ Գարգրցյանին' 34-312-րդ հոդվածի (կաշառք տալու հանցափորձը) 2-րդ մասի հատկանիշներով: