Վանաձորում ապօրինի ծառահատման դեպքի առթիվ հարուցվել է քրեական գործ (տեսանյութ)

ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ Վանաձոր քաղաքում ապօրինի ծառահատման դեպքի առթիվ:

2016թ. օգոստոսի 17-ին ահազանգ է ստացվել, որ Վանաձոր քաղաքի Տ.Մեծ փողոցում ապօրինի հատվել է փշատերև 6 հատ ծառ՝ պատճառելով զգալի չափերի վնաս:

Դեպքի առթիվ 2016 թվականի օգոստոսի 19-ին ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 296-րդ հոդվածի 1-ին մասով:

Կատարվում է նախաքննություն:

Ձեռնարկվում են անհրաժեշտ քննչական և դատավարական միջոցառումներ՝ դեպքի հանգամանքների բազմակողմանի, օբյեկտիվ և լրիվ քննությունն ապահովելու համար:

Հանձնարարություն է տրվել ոստիկանության համապատասխան ստորաբաժանումներին միջոցներ ձեռնարկել՝ առերևույթ հանցագործություն կատարած անձի (անձանց) ինքնությունը պարզելու և վարույթն իրականացնող մարմնին ներկայացնելու ուղղությամբ:

Հիշեցնենք, որ խնդրով զբաղվում էր ԱԺ պատգամավոր Էդմոն Մարուքյանը, նա խոստացել էր, որ հետևողական է լինելու, որ բոլոր պատասխանատուները պատժվեն այս վանդալիզմի համար։ «Սիրելի Վանաձորցիներ ահա ՀՀԿ կառավարման արդյունքը, որն ուղղակի միտված է կանաչ Վանաձորի ոչնչացմանը ու ևս 5 տարի ցանկանում են այս ամենը շարունակել։ Ես գրավոր հարցումներ եմ պատրաստել այս խնդրով և հետևողական եմ լինելու, որ բոլոր պատասխանատուները պատժվեն այս վանդալիզմի համար։ Բան չմնաց այս ամենին էլ վերջ կլինի !»,-գրել էր պատգամավորը: