Երբ մարդը խիղճը կորցնում է, նրանից ամեն ինչ սպասելի է…

Լավ, մի պահ ընդունենք, թե մարդը ծայրահեղ կարիքի մեջ է եղել (թեև տվյալ քրեական գործով այդպիսի տեղեկություն չի հրապարակվել, չունենք) և, այդ կարիքից դրդված, կատարել է գողություն: Չենք արդարացնում, անշուշտ, հանցավոր արարք է, անընդունելի, դատապարտելի, բայց և ինչ-որ տեղ հասկանալի, մարդկային տրամաբանության մեջ տեղավորվող, եթե, իհարկե, իր նման կարիքավոր մեկից չի կատարել գողությունը: Բայց տրամաբանությունից էլ, խղճից էլ չափազանց դուրս է, երբ գողության թիրախ է դարձվել շենքի վերելակի արգելակման կոճը, որի բացակայության հետևանքով միգուցե մարդիկ մահանային:

Քրեական գործի նախաքննությամբ պարզվել է, որ Ռաֆիկ Սեդրակյանը, ուրիշի գույքը գաղտնի հափշտակելու դիտավորությամբ, 2016թ. ապրիլի 21-ի ժամը 15:00-ից մինչև 2016թ. ապրիլի 26-ի ժամը 10:15-ը ժամանակահատվածում տեխնիկական միջոցների գործադրմամբ բացելով Երևանի Ֆրունզե փողոցի թիվ 6/5 շենքի վերելակի մեխանիկական սրահի մուտքի դռան կողպեքը, ապօրինի մուտք է գործել մեխանիկական սրահ և այնտեղից գողացել վերելակի արգելակման կոճը։

Բացի վերը նշվածից, Ռ. Սեդրակյանը, ըստ մեղադրական եզրակացության, նույն դիտավորությամբ 2016թ. մայիսի 10-ի ժամը 23:30-ից մինչև 2016թ. մայիսի 11-ի ժամը 09:00-ը ժամանակահատվածում տեխնիկական միջոցների գործադրմամբ բացելով Երևանի Եղիշե Թադևոսյան փողոցի թիվ 12/7 շենքի 1-ին մուտքի 9-րդ հարկում գտնվող Արարատ Վարդանյանին պատկանող խորդանոցի մուտքի դուռը, ապօրինի մուտք է գործել նշված խորդանոց և այնտեղից գաղտնի հափշտակել 1 հատ ինքնաեռ, 1 շիշ օղի, 36 հատ օղու և հյութի բաժակներ:

Համաձայն քր. գործի նյութերի, Ռ. Սեդրակյանը կատարել է նաև գողության փորձ. 2016թ. ապրիլի 2-ի ժամը 00:30-ից մինչև ժամը 09:00-ը ժամանակահատվածում փորձել է Երևանի Եղիշե Թադևոսյան փողոցի նույն շենքի 1-ին մուտքի 4-րդ հարկում գտնվող Ռոբերտ Սաֆարյանին պատկանող խորդանոցի մուտքի դուռը բացելու եղանակով, ապօրինի մուտք գործել ներս, սակայն չկարողանալով բացել խորդանոցի մուտքի դուռ, հանցագործությունն իր կամքից անկախ հանգամանքներով չի կարողացել ավարտին հասցնել։

Վերը նշված արարքների համար Ռաֆիկ Սեդրակյանին մեղադրանք է առաջադրվել ՀՀ քրեական օրենսգրքի 177-րդ հոդվածի («Գողությունը») 2-րդ մասի 3-րդ կետի և 34-177-րդ հոդվածի (գողության հանցափորձը) 2-րդ մասի 3-րդ կետի հատկանիշներով, որպես խափանման միջոց ընտրվել է կալանքը: