Առանձնապես խոշոր չափերի գումարի` 3 մլն ռուբլու ռեկետը կամ շորթումը ձախողվել է, դիմել են փախուստի

Հետաքրքիր է՝ ինչո՞վ են մտածել սույն պատմության հերոսները… Երևի վստահ են եղել, որ շորթման համար թիրախ ընտրված անձն անպայման կվախենա իր ու մերձավորների կյանքի նկատմամբ սպառնալիքներից, կհանի ու կտա իրենց պահանջած գումարը: Սակայն նա կամ չի վախեցել, կամ պարզապես չի ունեցել պահանջվող գումարը, խումբն իր հաշվարկներում սխալվել է, ու շորթումը` ձախողվել:

Ռուսաստանի Դաշնության Խաբարովսկ քաղաքի բնակիչ Արմեն Բաբլոյանը Խաբարովսկ քաղաքում զբաղվել է շինարարական բիզնեսով: Ինչպես պարզվել է քրեական գործի նախաքննությամբ, նախկինում ՀՀ քրեական օրենսգրքի 268-րդ հոդվածի 1-ին մասով մեղավոր ճանաչված Արայիկ Զաքարյանը և Երևանի բնակիչ, ՌԴ քրեական օրենսգրքի 145-րդ հոդվածի 2-րդ մասով և ՀՀ քրեական օրենսգրքի 258-րդ հոդվածի 1-ին մասով մեղավոր ճանաչված Արթուր Հովհաննիսյանը Ռուսաստանի Դաշնությունում, 2015թ. աշնանից սկսած, նախնական համաձայնության գալով միմիյանց հետ՝ Արմեն Բաբլոյանից 3 միլիոն ռուսական ռուբլի շորթելու վերաբերյալ, Ռուսաստանում պարբերաբար սկսել են Ա. Բաբլոյանին, նրա ընտանիքի անդամներին, ինչպես նաև վերջինիս գույքը ոչնչացնելու սպառնալիքներով ապօրինաբար պահանջել իրենց հանձնել 3 միլիոն ռուսական ռուբլի: Սակայն Ա. Բաբլոյանը հրաժարվել է կատարել Արայիկ Զաքարյանի և Արթուր Հովհաննիսյանի անօրինական պահանջները:

2015թ. դեկտեմբերի 13-ին Արմեն Բաբլոյանն ընտանիքի անդամների հետ եկել է Հայաստանի Հանրապետություն:

2016թ. փետրվարի 28-ին Ա. Բաբլոյանը կնոջ՝ Զլատա Բուրբելինայի և երեքամյա դստեր՝ Լիա Բաբլոյանի հետ գտնվել են Եղեգնաձոր քաղաքի Մոմիկի թիվ 6/17 հասցեում գտնվող հայրական տանը: Ըստ մեղադրական եզրակացության, նույն օրը, ժամը 21:40-ի սահմաններում Արայիկ Զաքարյանը, Տավուշի մարզի Բերդ քաղաքի բնակիչ Հրաչյա Վիրաբյանը, Արթուր Հովհաննիսյանը, նրանց հետ ինքնությունը չպարզված մեկ այլ անձ թակել են նշված հասցեում գտնվող բնակարանի մուտքի դուռը: Այնուհետև, երբ Արմեն Բաբլոյանը բացել է դուռը, նրանք չորսով Ա. Բաբլոյանի և նրա ընտանիքի անդամների նկատմամբ բռնություն գործադրելու՝ սպանելու, ոչնչացնելու, նրանց փրթելու սպառնալիքներ տալով, պահանջել են իրենց հանձնել 20 010 000 դրամին համարժեք 3 միլիոն ռուսական ռուբլի, նաև փորձել են ներս խուժել: Արմեն Բաբլոյանը և բնակարանի ներսում գտնվող Զլատա Բուրբելինան սկսել են օգնություն կանչել, իսկ երբ Զլատա Բուրբելինան հայտարարել է, որ կատարվածի մասին հայտնել է ոստիկանությանը և ոստիկանները գալիս են, Արայիկ Զաքարյանը, Հրաչյա Վիրաբյանը, Արթուր Հովհաննիսյանը և նրանց հետ ինքնությունը չպարզված մյուս անձը, համաձայն քր. գործի նյութերի, Ա. Բաբլոյանի և նրա մերձավոր ազգականների հասցեին շարունակելով սպանելու, ոչնչացնելու, նրանց փրթելու սպառնալիքներ տալ, պահանջել են մինչև հաջորդ օրվա ժամը 12-ն իրենց հանձնել 3 միլիոն ռուսական ռուբլի, ապա դիմել փախուստի:

Վերը նշված արարքի համար Արայիկ Զաքարյանին և Արթուր Հովհաննիսյանին մեղադրանք է առաջադրվել ՀՀ քրեական օրենսգրքի 182-րդ հոդվածի («Շորթումը») 3-րդ մասի 2-րդ կետի հատկանիշով, երկուսի նկատմամբ էլ որպես խափանման միջոց ընտրվել է կալանքը: