Քննվում է Խանդոյանի գործը. բազմաթիվ քաղաքացիներ հավաքվել են դատարանի դիմաց (լուսանկարներ)

Այս պահին Վերաքննիչ քրեական դատարանը քննում է Արայիկ Խանդոյանի խափանման միջոցը փոխելու վերաքննիչ բողոքը։ Հուլիսի 22-ին Խանդոյանի դատը հետաձգվել էր՝ հաշվի առնելով նրա դիմումը: Նշենք, որ, ըստ դիմումի, Խանդոյանը ցանկացել էր ներկա գտնվել դատական նիստն։

Այս մասին ԼՈՒՐԵՐ.com-ի թղթակցի հետ զրույցում ասաց Արայիկ Խանդոյանի փաստաբան Արա Ղարագյոզյանը, մասնավորապես, նշելով հետևյալը. «Խանդոյանը կալանավորվել է «Շտապ օգնության» տուժող ճանաչված երեք բժիշկների ցուցմունքի հիման վրա, ինչը բավարար հիմք չէ։ Մենք դիմել ենք վերաքննիչ դատարան և վիճարկում ենք հիմնավոր կասկածը։ Կալանավորման հիմքերը բացակայում են, մենք պահանջելու ենք գրավ կիրառել, որը ևս նախկինում մերժվել էր: Վերաքննիչ դատարանն այսօր պետք է որոշում կայացնի այդ հարցում ևս»։

Ղարագյոզյանը նաև հավելեց, որ բժիշկների ներսում գտնվելու ժամանակ Խանդոյանը եղել է բուժօգնություն ստացողի կարգավիճակում և նրա դեմ ուղղված մեղադրանքը պարզապես հակատրամաբանական է։

Այս պահին դատարանի դիմաց մարդաշատ է: Ի աջակցություն Խանդոյանի, այստեղ են հավաքվել նրա հարազատները, ընկերները, բարեկամաները և «Սասնա ծռերի» համակիրները:

Հիշեցնենք, որ Ա․ Խանդոյանը մեղադրվում է ՀՀ քրեական օրենսգրքի 218 հոդվածի 3-րդ մասի 1-ին կետով, այն է՝ պատանդ վերցնելը և 235 հոդվածի 3-րդ մասով՝ ապօրինի զենք-զինամթերք ձեռք բերելը, իրացնելը, պահելը: Հուլիսի 22-ին դատարանը հետաձգել էր Խանդոյանի դատը, հաշվի առնելով նրա դիմումը, համաձայն որի Խանդոյանը ցանկացել էր ներկա գտնվել դատական նիստին։