Ավտոմեքենայի գազաբալոնը լցավորելու պատրվակով. Իրանի քաղաքացիներին կողոպտելու տեխնոլոգիան

Ստորև ներկայացվող հանցագործությունը հայի ազգային նկարագրից չափազանց հեռու է: Հազարամյակներ շարունակ մենք աշխարհին հայտնի ենք եղել մեր առաքինություններով, այդ թվում նաև՝ հյուրի նկատմամբ առանձնահատուկ վերաբերմունքով, նույնիսկ հյուրամեծարությամբ: Սակայն, մեր շարքերում, ցավոք, կան մարդիկ, որոնց հոգը չէ բնավ, որ իրենց ճղճիմ, նեղ անձնական շահեր հետապնդող, եսամոլական արարքի հետևանքով օտարների մոտ ստվեր է նետվում մեր ազգային նկարագրի վրա:

Քրեական գործի նախաքննությամբ պարզվել է, որ նախկինում դատված Հրաչիկ Գևորգայանն իր վարած «Մերսեդես-Բենց» մակնիշի, 34DA866 հաշվառման համարանիշի ավտոմեքենան վարելով որպես տաքսի, 2015թ. հուլիսի 20-ին, ժամը 11:30-ի սահմաններում Երևանի Կոմիտասի պողոտայից ընդունելով պատվեր Իրանի Իսլամական Հանրապետության քաղաքացիներ Սեյեդ-Ադել Սեյեդ-Մաջիթի Թավաքոլիից, Մուհամադ-Հիվա Աբդուլլայի Ամինիից և Հաուռե Հասանի Նավիդիից՝ 100 ԱՄՆ դոլար վարձավճարի դիմաց նրանց և նրանց ուղեբեռները Մեղրի քաղաք տեղափոխելու համար, պահանջելով ու ստանալով նշված գումարը, ավտոմեքենայով նրանց տեղափոխել է մինչև Արարատի մարզի Մարմարաշեն գյուղ:

Այստեղ, ըստ մեղադրական եզրակացության, Հ. Գևորգայանն ուղևորներին պատկանող ուղեբեռների մեջ եղած գույքը բացահայտ հափշտակելու դիտավորությամբ, ավտոմեքենայի գազաբալոնը լցավորելու պատրվակով մուտք է գործել գազալցակայանի տարածք:

Այնուհետև ուղևորներից պահանջել է իջնել ավտոմեքենայից ու սպասել սպասասրահում, որից հետո, առանց ավտոմեքենայի գազաբալոնը լցավորելու, ավտոմեքենան վարելով դիմել է փախուստի, բացահայտ հափշտակելով ավտոմեքենայի բեռնախցիկում գտնվող Սեյեդ-Ադել Սեյեդ-Մաջիթի Թավաքոլիին, Մուհամադ-Հիվա Աբդուլլայի Ամինիին և Հաուռե Հասանի Նավիդիին պատկանող 6000 դրամ արժողության մեկ հատ վարսահարդարիչ, 15 000 դրամ արժողության մեկ հատ ջրասուզակի ակնոց, 2000 դրամ արժողության մեկ հատ մազերի արդուկ, 3000 դրամ արժողության մեկ հատ խաղալիք, 384 264 դրամին համարժեք 800 ԱՄՆ դոլար գումար, 1458 դրամին համարժեք 90 000 ԻԻՀ ռիալ, 68 500 դրամ արժողության 1 հատ ճամպրուկ, 3 հատ սպորտային պայուսակ, տարբեր տեսակի հագուստներ, ընդհանուրը' 480 249 դրամ արժողության:

Վերը նշված արարքի համար Հրաչիկ Գևորգայանին մեղադրանք է առաջադրվել ՀՀ քրեական օրենսգրքի 176-րդ հոդվածի («Կողոպուտը») 1-ին մասի հատկանիշով: Այսպես էլ է պատահում, երբեմն ուղևորներն են կողոպտում տաքսու վարորդներին, երբեմն տաքսու վարորդները՝ ուղևորներին: