Դատը հետաձգվեց Գևորգ Սաֆարյանի դատարան «չներկայանալու» պատճառով

Գևորգ Սաֆարյանի գործով դատը Կենտրոն եւ Նորք Մարաշ համայնքների ընդհանուր իրավասության դատարանում կրկին հետաձգվեց մեկ ամսով։ Պատճառը Գևորգ Սաֆարյանի դատարան «չներկայանալն» էր։

Այս մասին դատարանի դիմաց լրագրողների հարցին ի պատասխան ասել է Գևորգ Սաֆարյանի փաստաբան Տիգրան Հայրապետյանը, ով դժվարացավ որևէ կերպ բացատրել Սաֆարյանին դատարան չբերելը։

«Երբ հուլիսի 18-ին նիստ էր նշանակված եւ Գևորգ Սաֆարյանին չէին ներկայացրել, ՔԿՀ-ն անզգույշ եղավ ու պատասխանեց, որ դատավորը չի պահանջել: Մի նիստ էլ նշանակված էր հուլիսի 25-ին, դատավորը եկավ ու հրապարակային ասաց, որ նպատակահարմար չի, որ Գեւորգ Սաֆարյանը բերվի դատարան: ՔԿՀ-ից ճշտեցինք, որ անվտանգության նկատառումներից ելներով չի բերվել: Հավանաբար մտածել են՝ կարող է հանրահավաք լինի, դա օգտագործվի իրենց համախոհների կողմից»,- մտաբերեց Տիգրան Հայրապետյանը՝ կարծիք հայտնելով, որ այդ իրավիճակը շարունակվում է:

Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Գեւորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով, նա կասկածվում է Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ բռնություն գործադրելու մեջ: