Թե ինչ է արել ամուսիններին «գուշակ» Պայծառը` «չար աչքերը» հանելու պատրվակով

Երբեմն զարմանալ, չէ, նույնիսկ ապշել կարելի է մեր որոշ համաքաղաքացիների միամտության, դյուրահավատության ու մինչև իսկ սնհավատության վրա: Այսպիսինները հաճախ դառնում են իրենց իսկ դյուրահավատության ու սնհավատության զոհը, հետո դիմում իրավապահներին, թե հասեք, օգնեք… Սա նրանցից մեկի՝ Շաքե Դանիելյանի հետ կապված պատմությունն է, որն իրավապահներին դիմելուց առաջ, դիմել էր «գուշակ» Պայծառի օգնությանը:

Ինչպես պարզվել է քրեական գործի նախաքննությամբ, Պայծառ Վարդանյանն ուրիշի գույքը խարդախությամբ հափշտակելու դիտավորությամբ, չարաշահելով իր ծանոթ Շաքե Դանիելյանի վստահությունը, վերջինիս ներկայանալով որպես գուշակ, «չար աչքերը» հանելու պատրվակով, վերջինիցս 2015թ. սեպտեմբերի կեսերին Երևանի Ն. Շենգավիթ 9-րդ փողոցի թիվ 1/1 շենքի 36-րդ բնակարանում վերցրել է խոշոր չափերի' 684 000 դրամ ընդհանուր արժողության ոսկյա զարդեր և խարդախությամբ հափշտակել դրանք:

Համաձայն քր. գործի նյութերի, Պայծառ Վարդանյանը, բացի վերը նշվածից, 2015թ. սեպտեմբերի կեսերին նույն բնակարանում Շաքե Դանիելյանի ամուսին Արա Ներսիսյանի պարանոցին նկատելով 763 000 դրամ արժողության ոսկյա շղթա, խարդախությամբ այն հափշտակելու դիտավորությամբ, կրկին «չար աչքերը» հանելու պատրվակով, հավատացնելով, թե ոսկյա շղթան վերադարձնելու է, Ա. Ներսիսյանից վերցրել է այն և հափշտակել:

Վերը նշված արարքի համար Պայծառ Վարդանյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 2-րդ մասի 2-րդ կետի հատկանիշով: