Իսկը հեռուստասերիալի սցենար, ոմանք իրենց դասերը երևի դրանցից առան…

Էջմիածնի ընդհանուր իրավասության դատարանում (նախագահող դատավոր` Վահե Խալաթյան) շարունակվում է դատաքննությունը Հայաստանում թերևս իր նախադեպը չունեցող մի քրեական գործով: Մտերմանալ այլ երկրի քաղաքացուհու հետ, նրա հետ արտերկրից գալ այստեղ' Հայաստանում վերջինիս սպանելու դիտավորությամբ, սպանելուց հետո վերադառնալ արտասահման, բնակվել նրա տանը ու հետո… Իսկը հեռուստասերիալի սցենար, ոմանք իրենց դասերը երևի դրանցից առան…

Քրեական գործի նախաքննությամբ պարզվել է, որ նախկինում դատված Գևորգ Խաչատրյանը, Ֆրանսիայի Հանրապետության քաղաքացուհի Մոնիկ Հարլեին շահադիտական դրդումներով կյանքից զրկելու դիտավորությամբ, Մարոկոյից Կասաբլանկա-Փարիզ- Երևան թիվ 102 չվերթով 2011թ. դեկտեմբերի 12-ին վերջինիս հետ ժամանել է Հայաստանի Հանրապետություն: Այստեղ Գևորգ Խաչատրյանը, ըստ մեղադրական եզրակացության, սպանել է Մոնիկ Հարլեին, հափշտակել բանկային քարտերը և 2012թ. հունվարի 19-ին վերադարձել Մարոկո: Այնուհետև բնակվելով Մարոկոյի Մարաքեշ քաղաքում գտնվող Մոնիկ Հարլեի առանձնատանը, փորձել է վերջինիս Ֆրանսիական բոլոր ակտիվների փոխանցում կատարել համացանցի միջոցով, սակայն 2012թ. մարտի 23-ին ձերբակալվել է Մարոկոյի ոստիկանության կողմից: Նա այնտեղ մեղադրվում է խարդախություն կատարելու մեջ:

Վերը նշված արարքի համար Գևորգ Խաչատրյանին մեղադրանք է առաջադրվել ՀՀ քրեական օրենսգրքի 104-րդ հոդվածի («Սպանությունը») 2-րդ մասի 8-րդ կետով, որպես խափանման միջոց ընտրվել է կալանքը: