Լայնածավալ գործազրկության պայմաններում շատ մարդիկ պատրաստ են կաշառք տալ ռուսական զորամասերում աշխատանքի տեղավորվելու համար

Հայաստանում քիչ թե շատ նորմալ վարձատրվող աշխատանք ճարելը, եթե, իհարկե, ազղեցիկ հովանավոր չկա, չնչին բացառություններով դարձել է անհնար ահավոր դժվար մի բան: Երկրում լայնածավալ գործազրկություն է, աշխատողներից շատերի ստացածն էլ ապրանքների այսօրվա գների ու ծառայությունների վարձերի պայմաններում աշխատավարձ չէ, այլ աղքատավարձ:
Միանգամայն հասկանալի է, որ այս իրավիճակում շատերն են ձգտում աշխատանքի տեղավորվել ռուսական զորամասերում, ուր վարձատրությունն այսօրվա կարիքները հոգալու համար քիչ թե շատ բավարար է: Ռուսական զորամասերում աշխատանքի տեղավորվելը դարձել է հատկապես խորհրդային տարիներին բուհ ընդունվելու պես մի բան` այն առումով, որ շատ մարդիկ պատրաստ են կաշառք տալ հանուն դրա:

Քրեական գործի նախաքննությամբ պարզվել է, որ Նարինե Ավետիսյանը 2013թ. նոյեմբերից 2014թ. փետրվարի վերջը ժամանակահատվածում Արմավիրի մարզի Նոր Արտագերս գյուղի բնակիչներ Յուրիկ Գևորգյանին և նրա կին Աննա Հասրաթյանին խաբելու ու վստահությունը չարաշահելու եղանակով, նրանց որդի Արման Գևորգյանին Արմավիր քաղաքում տեղակայված ռուսական զորամասում աշխատանքի տեղավորելու պատրվակով Յու. Գևորգյանից ու Ա. Հասրաթյանից հափշտակել է խոշոր չափերի` ընդհանուրը 1 515 150 դրամ գումար: Ըստ մեղադրական եզրակացության, նշված գումարից 1 215 150 դրամին համարժեք 3000 ԱՄՆ դոլարը նրան է հանձնվել 2013թ. նոյեմբերի վերջին Արմավիր քաղաքի թիվ 5 միջնակարգ դպրոցի մոտ «ԳԱԶ-24» մակնիշի, 19ԼՏ 931 համարանիշի ավտոմեքենայի մեջ, իսկ 300 000 դրամը' 2014թ. փետրվարի վերջին, նույն վայրում ու նույն ավտոմեքենայի մեջ:

Համաձայն քր. գործի նյութերի, Նարինե Ավետիսյանը, բացի վերը նշվածից, 2013թ. նոյեմբերից 2014թ. հունվարի սկիզբը ժամանակահատվածում Լոռու մարզի Սպիտակ քաղաքի բնակիչ Արշալույս Նիկողոսյանին ու նրա ընտանիքի անդամներին խաբելու ու վստահություը չարաշահելու եղանակով, Ա. Նիկողոսյանի որդի Արման Նիկողոսյանին Արմավիր քաղաքում տեղակայված ռուսական զորամասում աշխատանքի տեղավորելու պատրվակով, նրանցից հափշտակել է դարձյալ խոշոր չափերի գումար (2 380 820 դրամ), այս անգամ շատ ավելին, քան նախորդ հափշտակությամբ ձեռք բերածը:

Ըստ մեղադրական եզրակացության, վերը նշված գումարից 810 100 դրամին համարժեք 2000 ԱՄՆ դոլարը Ն. Ավետիսյանին է հանձնվել 2013թ. նոյեմբերին Սպիտակ քաղաքում, 810 720 դրամին համարժեք 2000 ԱՄՆ դոլարը հանձնվել է 2013թ. դեկտեմբերին Արմավիր քաղաքում նրա վարձակալած բնակարանում: Բացի այդ, Յու. Գևորգյանի ու Աննա Հասրաթյանի կողմից 2013թ. դեկտեմբերին 430 000 դրամ նրան է հանձնել Աննա Հասրաթյանը Արմավիր քաղաքի Երևանյան փողոցում: Վերջինս 2013թ. դեկտեմբերին Արմավիրի մարզի Նոր-Արտագերս գյուղում նրան է հանձնել նաև 130 000 դրամին համարժեք ոսկյա զարդեր, իսկ 2014թ. հունվարի 1-ից 3-ը ժամանակահատվածում ևս 200 000 դրամ գումար Յուրիկ Գևորգյանի ընտանիքի անդամների կողմից Նոր Արտագերս գյուղում նրան է փոխանցվել Արմավիրի մարզի Նոր Արմավիր գյուղի բնակիչ, տաքսու վարորդ Տիգրան Այվազյանի միջոցով:

Վերը նշված արարքի համար Նարինե Ավետիսյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 2-րդ մասի 2-րդ կետի հատկանիշով: