Դատավորը քաղաքական պատվեր էր կատարում. փաստաբան

Այսօր Երևանի Արաբկիր և Քանանքեռ-Զեյթուն վարչական շրջանների ընդհանուր իրավասության դատարանը շարունակելու է Արարատ Խանդոյանին՝ կալանքից գրավով ազատելու մասին պաշտպանների միջնորդության քննարկումը: Դատական նիստը տեղի կունենա այսօր ժամը՝ 16.30-ին:
Արայիկ Խանդոյանին մեղադրանք է առաջադրվել ՀՀ քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք զինամթերք ձեռք բերելը, իրացնելը, պահելը, փոխադրելը): Որպես պատանդի մեղադրող կողմը դիտարկում է բժիշկներին որոնք վերջին շրջանում պահվել էին գնդում վիրավորներին բուժօգնություն ցույց տալու համար:

Հետաքրքրական է այն, որ Արայիկ Խանդոյանն այդ ժամանակահատվածում եղել է ոչ թե պատանդ պահողի կարգավիճակում, այլ՝ բուժօգնություն ստացողի:

ԼՈՒՐԵՐ.com-ի թղթակցի հետ զրույցում փաստաբան Արա Կարագյոզյանն ասաց, որ որպես նախնական խափանման միջոց կալանք նշանակելն անհիմն էր և դատավորը փաստացի քաղաքական պատվեր էր կատարում:

Նշենք, որ խափանման միջոցի ընտրությունը հիմնավորվել էր Արայիկ Խանդոյանի հնարավոր փախուստը կանխելու համար: Այս մասով փաստաբան Կարագյոզյանը հավելեց. «Մենք էլ կարող ենք բազմաթիվ հիմքեր ներկայացնել, որ Արարատ Խանդոյանը մասնակցել է ղարաբաղյան ազատամարտին, ապրիլյան պատերազմի առաջին իսկ օրից ներկա է գտնվել, նա պետությունից փախչելու որևէ տեղ չունի»: