Արամ Մանուկյանի և Աշոտ Պետրոսյանի առողջական վիճակն արդեն լավ է

«Էրեբունի» բժշկական կենտրոնում այսօր վիրահատվել են «Սասնա ծռեր» խմբի անդամներ Արամ Մանուկյանը և Աշոտ Պետրոսյանը։ Վերջիններիս առողջական վիճակը «Էրեբունի» ԲԿ տնօրեն Միքայել Մանուկյանը գնահատեց բավարար։

Մանուկյանը նշեց, որ Աշոտ Պետրոսյանին 1-2 օրից կտեղափոխեն «Դատապարտյալների հիվանդանոց» ՔԿՀ, իսկ Արամ Մանուկյանը՝ դեռ մի քանի օր կմնա վերակենդանացման բաժանմունքում, որպեսզի բժիշկները վերահսկեն հետվիրահատական շրջանը։

«Էրեբունի» ԲԿ տնօրեն Միքայել Մանուկյանն անդրադառնալով հետվիրահատական պրոցեսին նշեց, որ նման վիրահատություններից հետո որևէ մեկի մոտ հաշմանդամություն չի նկատվում, հետևաբար Արամ Մանուկյանին ևս դա չի սպառնում, քանի որ վիրահատությունը անցել է նախատեսվածի պես: Բոլոր բեկորները վերականգնվել են, մետաղային հարթակը ճիշտ տեղադրվել է։

Հիշեցնենք, որ Արամ Մանուկյանին մեղադրանք է առաջադրվել ՀՀ Քրեական օրենսգրքի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (Կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։