Կեղծ ատեստատը ներկայացրել է ԵՊՀ, հետո Հայաստանում ԱՄՆ դեսպանատուն

Այսօր՝ Գիտելիքի օրը, դպրոց գնացող մեր բոլոր աշակերտներին, ի թիվս այլ բարեմաղթությունների, մաղթենք նաև այնպիսի ուսումնառություն, որ կյանքում նրանցից որևէ մեկը կարիքը չունենա կեղծ ատեստատ ձեռք բերելու: Իսկապես սովորեն, որևէ մեկը դպրոց չգնա ձևի համար կամ նույնիսկ չգնալով, մտածի ատեստատ ձեռք բերելու մասին: Այո, լինում են նաև այդպիսի դեպքեր…

Քրեական գործի նախաքննությամբ պարզվել է, որ Աննա Առաքելյանը 2001 թվականին, չպարզված օրը, հորից՝ Սերգեյ Մինասյանից, ստացել է Երևանի թիվ 123 միջնակարգ դպրոցն ավարտելու վերաբերյալ իր անվամբ պատրաստված իրավունք վերապահող ակնհայտ կեղծ փաստաթուղթ հանդիսացող ԱԱ 009950 սերիա-համարի միջնակարգ կրթության ատեստատը և 2002 թ. հուլիսի 11-ին բարձրագույն ուսումնական հաստատություն ընդունվելու նպատակով նշված կեղծ ատեստատը օգտագործել է՝ ներկայացնելով Երևանի պետական համալսարան:

Բացի վերը նշվածից, Ա. Առաքելյանը 2015 թվականի օգոստոս ամսին շահելով ԱՄՆ պետքարտուղարության կողմից կազմակերպվող ամենամյա ներգաղթային մուտքի վիզայի վիճակախաղը և չունենալով միջնակարգ կրթություն, ըստ մեղադրական եզրակացության, Երևանի թիվ 123 միջնակարգ դպրոցն ավարտելու վերաբերյալ հիշյալ կեղծ ատեստատը 2015թ. հոկտեմբերի 27-ին օգտագործել է՝ ներկայացնելով Հայաստանի Հանրապետությունում գործող Ամերիկայի Միացյալ Նահանգների դեսպանատուն:

Դատելով ամենից, Երևանի պետական համալսարանում չեն նկատել Ա. Առաքելյանի ներկայացրած ատեստատի կեղծ փաստաթուղթ լինելը, այդ հանգամանքը բացահայտվել է Հայաստանում Ամերիկայի Միացյալ Նահանգների դեսպանատանը, և Աննան Ամերիկա չի կարողացել մեկնել:

Վերը նշված արարքի համար Աննա Առաքելյանին մեղադրանք է առաջադրվել ՀՀ քրեական օրենսգրքի 325-րդ հոդվածի («Փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը») 1-ին մասի հատկանիշով: