Վերջին 2.5 տարում ՄԻԵԴ-ը 335 հազար եվրոյի վճիռ է կայացրել Հայաստանի դեմ

Վերջին երկուսուկես տարիների ընթացքում Մարդու իրավունքների եվրոպական դատարանը Հայաստանի դեմ կայացրել է 335 հազար եվրոյի վճիռ: Այդ մասին գործադիրի նիստում նշեց կառավարության աշխատակազմի ղեկավար-նախարար Դավիթ Հարությունյանը' ներկայացրնելով վիճակագրական տվյալներ, թե վերջին տարիներին Հայաստանը որքան գումար է վճարել ՄԻԵԴ-ի ՝ Հայաստ անի դեմ կայացված վճիռների համար:

Ըստ Հարությունյանի' 2014 թվականին Հայաստանի դեմ կայացվել է չորս վճիռ, որի դիմաց վճարվել է 166 հազար եվրո, 2015-ին կայացվել է ութ վճիռ և վճարվել է 86 հազար եվրո, իսկ արդեն 2016-ին կայացվել է կրկին ութ վճիռ և վճարվել 83 հազար եվրո:

ՀՀ վարչապետ Հովիկ Աբրահամյանը հարցրեց, թե ինչի հետևանք են ընդդեմ Հայաստանի կայացված վճիռները, ինչին ի պատասխան' Դավիթ Հարությունյանը նշեց. «Պատճառները, կածում եմ, պարզ են, դա մեր դատական համակարգում առկա սխալներն են, իհարկե, բոլոր երկրներում էլ լինում են սխալներ, բայց երբ երկրում սպառվում են սխալը շտկելու միջոցները, մարդիկ դիմում են ՄԻԵԴ»:

Կառավարության նախորդ նիստերից մեկում, արձագանքելով ՄԻԵԴ հերթական վճռին, Հովիկ Աբրահամյանը հանձնարարել է ներկայացնել վիճակագրական տվյալներ, թե վերջին ժամանակահատվածում որքան գումար է հատակցվել վճիռներն իրականացնելու համար և հարց բարձրացրել' արդյոք որևէ մեկը պետք է պատասխան տա այդ իրավիճակի համար: