Արամ Մանուկյանը պետք է մնա «Էրեբունի» ԲԿ-ում

Արամ Մանուկյանն ու Աշոտ Պետրոսյանն արդեն 4-րդ օրն է՝ գտնվում են «Դատապարտյալների հիվանդանոց» ՔԿՀ-ում։ Օգոստոսի 30-ին նրանք վիրահատվել են ու գտնվում են հետվիրահատական շրջանում։

Այս մասին ԼՈՒՐԵՐ.com-ի հետ զրույցում նշեց Արամ Մանուկյանի փաստաբան Ինեսա Պետրոսյանը։

Փաստաբանն ասաց, որ երեկ տեսակցել է Արամ Մանուկյանին. նրա առողջական վիճակը գնահատվում է կայուն ծանր։

«Արամը գունատ էր և շատ թույլ, նա ենթարկվել է խիստ բարդ վիրահատության և տևական ժամանակ է անհրաժեշտ, որպեսզի ապաքինվի»։

Անդրադառնալով այն հարցին, թե Արամ Մանուկյանին շուտով պետք է տեղափոխեն «Դատապարտյալների հիվանդանոց» ՔԿՀ, Ինեսա Պետրոսյանն ասաց, որ ամեն ինչ անելու է, որպեսզի Արամը ողջ հետվիրահատական շրջանն անցկացնի «Էրեբունի» ԲԿ-ում, քանի որ «Դատապարտյալների հիվանդանոց» ՔԿՀ-ն չի ապահովում համապատասխան սանիտարահիգենիկ պայմաններ հետվիրահատական շրջանի համար։

«Ես դիմում եմ ուղարկել համապատասխան մարմիններին և նույնիսկ բողոք եմ ներկայացրել «Դատապարտյալների հիվանդանոց» ՔԿՀ-ի դեմ, որպեսզի Արամին այնտեղ չտեղափոխեն»:

Անդրադառնալով «Դատապարտյալների հիվանդանոց» ՔԿՀ-ի ադմինիստրացիայի ապօրինի գործելակերպին՝ Ինեսա Պետրոսյանը նշեց, որ երեկ քննիչի հետ փորձել են մուտք գործել «Դատապարտյալների հիվանդանոց» ՔԿՀ, սակայն ՔՀԿ-ի ադմինիստրացիան արհեստական խոչնդոտներ է ստեղծել՝ միաժամանակ խախտելով իր և իր վստահորդի իրավունքները, որովհետև «Դատապարտյալների հիվանդանոց» էր գնացել Պավլիկ Մանուկյանին դատավարական պրոցեսի ընթացիկ որոշումներին ծանոթացնելու համար։

«Նրանք բառացիորեն թույլ չեն տվել, որպեսզի ես Պավել Մանուկյանին տեղեկացնեմ դատարանի ընթացիկ որոշումների մասին: Նույն կարգն ու օրենքը միշտ գործել է և բավականին երկար ժամանակ այդ կերպ աշխատել ենք: Նույն «Դատապարտյալների հիվանդանոց քրեակատարողական հիմնարկում» դրանից առաջ էլ ենք մուտք գործել և որևէ խնդիր չի եղել, հանկարծ երեկ ինչ-որ խնդիրներ ծագեցին»:

Հիշեցնենք, որ Արամ Մանուկյանին մեղադրանք է առաջադրվել ՀՀ Քրեական օրենսգրքի 219-րդ հոդված 3-րդ մասի 1-ին կետով (Կազմակերպված խմբի կողմից՝ շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասով (Կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։

Միքայել Նազարյան