Կարո Եղնուկյանն ասել է, թե իրավապահների տված սննդից «Սասնա ծռեր»-ի անդամները թունավորվել են

Այսօր լրագրողների հետ հանդիպման ժամանակ Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցն ասաց, որ Կարո Եղնուկյանի և մի քանիսի նկատմամբ քաղաքական հետապնդում է իրականացվում՝ նրանց կալանավորումը հիմնավորելով որպես «Սասնա ծռերին» օժանդակություն։

«Մենք նրանց համարում ենք իրենց հայացքների համար հետապնդման ենթարկվածներ։ Մոտեցումների ամբողջ գործիքակազմը խոսում է այն մասին, որ տեղի է ունենում ակնհայտ ապօրինություն։ Լավ հասկանում ենք, որ օժանդակողների այս խմբի միջոցով փորձ է արվում բոլորովին այլ պատկերացում ստեղծել «Սասնա ծռեր»-ի գործողությունների վերաբերյալ։ Բայց կարծում եմ՝ իրավական հիմնավորումները բացակայում են։ Հերթական անգամ Հայաստանի հանրապետության արդարադատությունը կարձանագրի իր պարտությունը եթե ոչ այստեղի դատարանում, ապա միջազգային դատարաններում։ Վարչապետն էլ հերթական անգամ կնեղանա, թե ինչու են դատավորները սխալ կատարում։ Սխալ են կատարում, որովհետև քաղաքական պատվեր են կատարում»,- ներկայացրեց Սաքունցը։

Փաստաբան Հայկ Ալումյանն իր խոսքում նշեց, որ, օրինակ՝ ուտելիք, ջուր տալը կամ բժշկական օգնություն ցուցաբերելը չի կարող համարվել հանցագործություն կատարողներին օժանդակում։

«Մեր դեպքում բոլոր 16 հոգու պարագայում վարույթն իրականացնող մարմինը փորձել է հիմնավորել օժանդակությունը հեռախոսազանգերով։ Այդ դեպքում բոլորը նրանց հետ հեռախոսազրույց են ունեցել, լրագրողները, բժիշկները և այլն։ Այդ տրամաբանությամբ՝ բոլորին պետք է մեղադրանք առաջադրվի»,- ասաց փաստաբանը։

Խոսելով կոնկրետ Կարո Եղնուկյանին առաջադրված մեղադրանքների մասին՝ Ալումյանը նկատեց. «Նրան մեղադրում են 4 գործողություն կատարելու մեջ. առաջինը՝ նա տեղեկություն է հրապարակել տեխնիկայի շարժի մասին, երկրորդ՝ նա միջոցներ է ձեռնարկել Ազատության հրապարակում հավաքվածներին տեղափոխել գնդի տարածք, երրորդ՝ նա իբր ապատեղեկատվություն է տարածել, թե իրավապահների տրամադրած սննդի պատճառով «Սասնա ծռեր»-ի տղաները թունավորվել են՝ հեղինակազրկելով իրավապահ մարմիններին և վերջինը՝ փորձել է ռադիոկապով ապահովել կապը տղաների հետ։

Պարոն Եղնուկյանը հայտնել է, որ նման ոչ մի գործողություն չի կատարվել։ Անգամ ներկայացված հեռախոսային ձայնագրություններում նման բան չի եղել։ Դրանցում նա խոսել է իր կնոջ հետ։ Ձայնագրություններից մեկում Կարոյի կինն ասել է, որ պետք չի հավաքվել Ազատության հրապարակում, այնտեղ եղած տեխնիկայի պատճառով։ Երկու խոսակցություն եղել է թունավորման մասին, որտեղ Եղնուկյանն ասել է՝ իր տեղեկություններով տղաներից երկուսը լավ չեն, երևի ժամկետանց սնունդից թունավորվել են։ Կինն էլ ասել է՝ հրապարակենք, Եղնուկյանն ասել է՝ ոչ։ Այդքան բան։ Կարո Եղնուկյանին մեղադրանք են առաջադրել, իբր նա հանցագործներին օժանդակել է ոստիկաններին երկար պատանդ պահելու մեջ, սակայն այդ ժամանակ ոստիկանները արդեն պատանդ չեն եղել»։

Ալումյանը նշեց, որ այս անհեթեթ մեղադրանքների համար բազմաթիվ միջնորդություններ են ներկայացրել Գլխավոր դատախազություն, քննչական խմբի ղեկավարին, սակայն հարցն ամեն կերպ շրջանցել են ու չեն պատասխանել։ «Մենք դիմել ենք դատարան, որ գլխավոր դատախազը չի կատարում իր պարտականությունները։ Վաղը չէ մյուս օրը Կենտրոնի դատարանում Գլխավոր դատախազի անգործության դեմ դատական նիստ տեղի կունենա։ Այնպիսի տպավորություն է, որ մեղադրանքները գրել են ոչ թե իրավաբանները, այլ բանասերները»,- հավելեց Հայկ Ալումյանը։