«Դուխով» տղեն վրա է քշել ոստիկաններին, հետո դանակը հանել ու…

Ասում են, հարբածի համար ծովը ծընկներից է… Օղին ոմանց համար հաճախ դառնում է առյուծի կաթ, որը խմելը դժվար չէ, բայց հետո դժվար, իսկ երբեմն անհնար է լինում հետևանքների տակից դուրս գալը: Լավ է, որ այս դեպքում ոստիկանները ճիշտ գնահատելով իրավիճակը, խելամիտ վարք են դրսևորել, որովհետև հակառակ պարագայում կարող էին կամ իրենք զոհվել, կամ իրենց վրա հարձակվողը:

Քրեական գործի նախաքննությամբ պարզվել է, որ Սուրեն Քերիմյանը 2016 թ. ապրիլի 28-ին, ժամը 03:15-ի սահմաններում, գտնվելով ալկոհոլային հարբածության վիճակում, Հրազդան քաղաքի Միկրոշրջան թաղամասում, թիվ 10 ավագ դպրոցին հարակից ճանապարհին նկատելով առկայծող փարոսիկները միացված վիճակում ծառայություն իրականացնող ոստիկանության Հրազդանի բաժնի ՈՒԱԶ մակնիշի, 032 ՈՍ 03 հաշվառման համարանիշի ավտոմեքենան, դուրս է եկել ավտոմեքենայի դիմաց, խոչընդոտելով երթևեկության ընթացքին:

Այնուհետև, ըստ մեղադրական եզրակացության, Սուրեն Քերիմյանը, առանց հիմնավոր պատճառի, ձեռքերով հարվածել է ավտոմեքենայի շարժիչի ծածկոցին, իսկ ոստիկանության Հրազդանի բաժնի ԱԳԲ ավագ տեսուչ Հակոբ Սողոյանի և հերթապահ մասի վարորդ Արմեն Թովմասյանի կողմից իրեն ուղղված՝ հակաօրինական վարքագիծը դադարեցնելու պահանջից հետո, բաճկոնի ծոցագրպանից հանել է խոհանոցային դանակը և կյանքի ու առողջության համար վտանգավոր բռնություն գործադրելու սպառնալիքներ տալով ոստիկանության աշխատակիցներին՝ կապված նրան կողմից իրենց ծառայողական պարտականությունների կատարման հետ, մոտեցել է նրանց:

Քր. գործի նյութերի համաձայն՝ վերջիններիս կողմից հետ քաշվելուց հետո, Ս. Քերիմյանը մոտեցել է ավտոմեքենային և դանակի շեղբի ծայրով երկու անգամ հարվածել շարժիչի ծածկոցին:

Վերը նշված արարքի համար Սուրեն Քերիմյանին մեղադրանք է առաջադրվել ՀՀ քրեական օրենսգրքի 316-րդ հոդվածի («Իշխանության ներկայացուցչի նկատմամբ բռնություն գործադրելը») 1-ին մասի հատկանիշով, որպես խափանման միջոց ընտրվել է կալանքը: