Քրեակատարողական հիմնարկի աշխատակցին դատում են էական վնաս պատճառած պաշտոնեական անփութության համար

Անցած ամիս ՀՀ գլխավոր դատախազությունից Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը ստացել է մի քրեական գործ, որով մեղադրյալը ՀՀ ԱՆ քրեակատարողական վարչության «Երևան-կենտրոն» քրեակատարողական հիմնարկի աշխատակից Էմիլ Սիմոնյանն է: Վերջինս 2003 թվականից աշխատելով նշված ԿԿՀ-ում, իրականացրել է պետական հատուկ ծառայություն և հանդիսացել մշտապես իշխանության ներկայացուցչի գործառույթներ իրականացնող պաշտոնատար անձ:

Համաձայն քր. գործ նյութերի, Է. Սիմոնյանը ծառայության նկատմամբ անբարեխիղճ և անփույթ վերաբերմունքի հետևանքով պատշաճ կարգով չի կատարել «Քրեակատարողական ծառայության մասին» ՀՀ օրենքի 24-րդ հոդվածի 1-ին մասի 3-րդ կետով, «Ձերբակալված և կալանավորված անձանց պահելու մասին» ՀՀ օրենքի 33-րդ հոդվածով և «ՀՀ ԱՆ քրեակատարողական ծառայության՝ կալանավորվածներին պահելու վայրերի և ուղղիչ հիմնարկների ներքին կանոնակարգը հաստատելու մասին» ՀՀ կառավարության թիվ 1543-Ն որոշման 93-րդ կետով նախատեսված իր պարտականությունները, ինչն էլ անզգուշությամբ էական վնաս է պատճառել անձի իրավունքներին, օրինական շահերին և պետության օրինական շահերին: Մասնավորապես՝ նա, ըստ մեղադրական եզրակացության, ճշգրիտ ու ժամանակին չի կատարել ՀՀ օրենսդրությամբ իրեն վերապահված պարտականությունները, խախտում է թույլ տվել կալանավորվածների նկատմամբ հսկողության հարցում և այլն:

Վերը նշված արարքի համար Էմիլ Սիմոնյանին մեղադրանք է առաջադրվել ՀՀ քրեական օրենսգրքի 315-րդ հոդվածի («Պաշտոնեական անփութությունը») 1-ին մասի հատկանիշով: