Դատախազությունը հանցավոր անգործություն է դրսևորում. փաստաբան

Կենտրոն և Նորք Մարաշ համայնքների ընդանուր իրավասության դատարանն այսօր հետաձգեց «Սասնա ծռերին» օժանդակելու մեջ մեղադրվող Կարո Եղնուկյանի գործով դատական նիստը, քանի որ դատախազը չէր ներկայացել։ Դատական նիստին ներկա չէր նաև Կարո Եղնուկյանը։ Այս հանգամանքը ևս դատարանի կողմից հաշվի առնվեց։ 

ԼՈՒՐԵՐ.com-ի հետ զրույցում Եղնուկյանի փաստաբան Տիգրան Հայրապետյանն ասաց, որ դատախազությունը հանցավոր անգործություն է դրսևորում. «Բազում հիմնավորված դիմումներ ենք ուղարկվել Եղնուկյանի կալանավորման, նախաքննական մարմնի կատարած օրինազանցությունների մասին, սակայն դատախազությունը չի արձագանքել մեր դիմումներին, դատախազությունը փակ է»: Փաստաբանը նաև անդրադարձավ իր պաշտպանյալի ձերբակալության հիմնավորումներին։

«Եթե ինչ-որ առումով առաջին օրերին կարելի էր ընդունել դատարանի՝ Եղնուկյանին կալանքի տակ պահելու թեկուզ ոչ հիմնավոր որոշումը, պատճառաբանությամբ, որ Եղնուկյանը կարող է օժանդակել «Սասնա ծռեր» խմբին, ապա այժմ Ծռերը զենքերը վայր են դրել և Եղնուկյանին կալանքի տակ պահելը ուղղակիորեն անիմաստ է»,- ներկայացրեց նա։ 

Հիշեցնենք, որ Կարո Եղնուկյանին մեղադրանք է առաջադրվել ՀՀ ՔՕ218–րդ հոդվածի հատկանիշներով (պատանդ վերցնելը), որը նախատեսում է 8–15 տարվա ազատազրկում։ Բացի այդ, նա մեղադրվում է նաև ՀՀ ՔՕ219–րդ հոդվածի հատկանիշներով (շենքեր, շինություններ, տրանսպորտի,հաղորդակցության կամ կապի միջոցներ զավթելը), որը նախատեսում է 6–12 տարվա ազատազրկում: