Ներկայանալով իբրև ՀՀ-ում եվրոպական բարեգործական հանձնաժողովի նախագահ

Եթե որևէ մեկը ձեզ հետ ծանոթանում է, առավել ևս' եթե այդ ծանոթությունը համացանցով է, իսկ, որոշ ժամանակ անց, առաջարկում է մի բան, որը կարծես երկնքից ընկած նվեր լինի' միայն թե, որպեսզի այն իրականություն դառնա, անհրաժեշտ է որոշ կանխավճար, ապա այդպիսի դեպքերում միշտ զգուշացեք, եթե, իհարկե, չեք ուզում դառնալ խարդախների խարդախության հերթական զոհը: Հիշեք, երբեք չմոռանաք, որ ձրի պանիրը, իսկ Հայաստանի պարագայում կարելի է ասել' նաև էժան պանիրը, թակարդում է լինում:

Քրեական գործի նախաքննությամբ պարզվել է, որ նախկինում արդեն չորս անգամ դատապարտված Արայիկ Սարգսյանը 2014թ. հունիսի 2-ին դատապարտվելով 4 տարի 6 ամիս ժամանակով ազատազրկման, ՀՀ տարբեր քրեակատարողական հիմնարկներում պատիժը կրելու ընթացքում 2014թ. հոկտեմբերին, ուրիշի գույքի հափշտակություններ կատարելու դիտավորությամբ, համացանցի միջոցով ծանոթացել է Արագածոտնի մարզի Գեղադիր գյուղի բնակչուհի Սիրարփի Գրիգորյանի, նրա մոր՝ Մագթաղ Գրիգորյանի հետ, և նրանց ներկայացել իբրև Հայաստանի Հանրապետությունում եվրոպական բարեգործական հանձնաժողովի նախագահ:

Ծանոթությունից հետո, մինչև 2015 թվականի հուլիսի 1-ը ժամանակահատվածում, Ա. Սարգսյանը, ըստ մեղադրական եզրակացության, համացանցով շփման և հեռախոսազանգերի միջոցով Մագթաղ և Սիրարփի Գրիգորյանների վստահությունը չարաշահելով, գոյություն չունեցող վերոհիշյալ բարեգործական կազմակերպության կողմից իբր անվճար բնակարաններ տրամադրելու պատրվակով, դրանց ձեռքբերման կանխավճարի, փաստաթղթավորման և այլ ծախսերը հոգալու նպատակով, պահանջել և բանկային փոխանցումների ու տարբեր մարդկանց միջոցով Մագթաղ Գրիգորյանից և Սիրարփի Գրիգորյաններից ստանալով, հափշտակել է առանձնապես խոշոր չափերով գումար, ընդհանուրը՝ 3 707100 դրամ:

Վերը նշված արարքի համար Արայիկ Սարգսյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 3-րդ մասի 1-ին կետի հատկանիշով: