Ոստիկանության մայորը 30 000 դոլարի կաշառք կտա՞ր, եթե վստահ չլիներ, որ տվածը ետ է բերելու և շատ ավելին էլ դեռ «աշխատելու» է

Այս պատմությանը ծանոթանալուց հետո միանգամից մի քանի հարց է առաջանում: Նախ, ոստիկանության մայորին, այն էլ' ոստիկանության կադրերի ռեզերվում գտնվող, այսինքն' չաշխատող, փաստացի գործազուրկ, որի աշխատավարձն աշխատած ժամանակ բարձր չի եղել, որտեղի՞ց այդքան մեծ գումար, որ 30 000 ԱՄՆ դոլար տվել է զուտ որպես կաշառք: Ողջախոհության շրջանակում ենթադրվում է, որ իր ունեցած ամբողջ գումարը չի տվել, թեև, եթե նույնիսկ հակառակն է, 30 000 դոլարն էլ փոքր գումար չէ:

Երկրորդ. ոստիկանության մայորը 30 000 դոլարի կաշառք կտա՞ր' ճանապարհային ոստիկանությունում աշխատելու համար, եթե ճանապարհային ոստիկանությունում կոռուպցիայի դեմ իրական պայքար լիներ, այս ոլորտում հայտարարված պայքարը չլիներ սոսկ ձևական, հիմնականում բառերով ու կեղծ հավաստումներով: Եվ եթե այդպիսի խոշոր գումար է տվել, տեղեկացված ու լիահույս չի՞ եղել, որ ճանապարհային ոստիկանության 2-րդ սպայական գումարտակում վաշտի հրամանատարի պաշտոնում նշանակելու դեպքում, շնորհիվ ճանապարհային ոստիկանությունում առկա կոռուպցիայի, ինքն իր տված 30 000 դոլարը ետ է բերելու և շատ ավելին էլ դեռ «աշխատելու» է…

Քրեական գործի նախաքննությամբ պարզվել է, որ Արթուր Հակոբյանը խաբեությամբ ուրիշի գույքի առանձնապես խոշոր չափերի հափշտակություն կատարելու դիտավորությամբ, նախապես համաձայնության գալով Արամ Մկրտչյանի հետ, երկուսով մոլորության մեջ են գցել ՀՀ ոստիկանության կադրերի ռեզերվում գրանցված, ոստիկանության մայոր Արթուր Ղալումյանին: Ըստ մեղադրական եզրակացության, Ա. Հակոբյանը Ա. Ղալումյանին հավաստիացրել է, թե ՀՀ ոստիկանապետի գլխավոր խորհրդական Հայկարամ Ստեփանյանին կաշառք տալու միջոցով կարող են նպաստել ՀՀ ոստիկանության «Ճանապարհային ոստիկանություն» ծառայությունում պաշտոնի նշանակվելու հարցում:

Համաձայն քր. գործի նյութերի՝ 2012թ. հունիսի 28-ին Երևանի «Արմենիա Մարիոթ» հյուրանոցի սրճարանում հանդիպելով Արթուր Ղալումյանին, ըստ նախապես կատարած դերաբաշխման, Արամ Մկրտչյանը ներկայացել է որպես Հայկարամ Ստեփանյանի կողմից այդ հանդիպմանն ուղարկված վստահելի անձնավորություն, խոսել են պաշտոնի նշանակման հարցի վերաբերյալ և խաբեությամբ չարաշահելով Ա. Ղալումյանի վստահությունը, հավաստիացրել, թե ճանապարհային ոստիկանության 2-րդ սպայական գումարտակում վաշտի հրամանատարի պաշտոնում նշանակելու համար անհրաժեշտ է 30 000 ԱՄՆ դոլար: Երբ վերջինս համաձայնել է տալ պահանջվող գումարը, Ա. Մկրտչյանը խոստացել է երկու աշխատանքային շաբաթվա ընթացքում լուծել պաշտոնի նշանակման հարցը, իսկ Ա. Հակոբյանը նույն օրը Ա. Ղալումյանից անձամբ ստացել է 25 000, իսկ հաջորդ օրը 5000 ԱՄՆ դոլար ու խաբեությամբ տիրացել են առանձնապես խոշոր չափերի' 12 մլն 558 900 դրամին համարժեք 30 000 ԱՄՆ դոլարի:

Վերը նշված արարքի համար Արթուր Հակոբյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 3-րդ մասի 1-ին կետի հատկանիշով: