Կարեն Գրիգորյանը նաև Թաեքվոնդոյի ֆեդերացիայի թեկնածուն է

Գովասանքի և խրախուսանքի է արժանի, երբ պետական պաշտոնյան, աշխատանքային ողջ ժամանակ զբաղված լինելով քաղաքի ու նրա բնակիչների առջև ծառացած խնդիրների լուծմամբ, սրտացավ ու հոգատար վերաբերմունք է դրսևորում նաև այլ բնագավառներում: Այդպիսին է Էջմիածնի գործող քաղաքապետ Կարեն Գրիգորյանը, ով հանդիսանում է նաև Հայաստանի թաեքվոնդոյի ֆեդերացիայի նախագահը 2014թ.:

Նրա ակտիվ ու գործուն աջակցության շնորհիվ զգալիորեն առաջընթաց է գրանցել թաեքվոնդոյի ֆեդերացիան: Լինելով բանիմաց և կառավարչական հմտություններով օժտված' Կարեն Գրիգորյանը երբևէ չի անտեսել ֆեդերացիայի անդամների առաջարկները՝ ուղղված մարզաձևի զարգացմանն ու ամեն կերպ իր աջակցությունն է բերում այս մարզաձևի զարգացմանն ու տարածմանը: Նրա կողմից այս տարիների ընթացքում ֆեդերացիան ապահովվել է անհրաժեշտ ժամանակակից սպորտային գույքով՝ ձեռք են բերվել թանկարժեք սենսորային պրոտեկտորներ, որոնք օգտագործվում են թե՛ տեղական, թե՛ միջազգային խաղերում: Դրանց կիրառումը գրեթե ամբողջությամբ զրոյացնում է մրցավարական ոչ ճիշտ, նաև կողմնակալ վերաբերմունքը, որը ներկա ժամանակներում խիստ տարածված ու մտահոգիչ երևույթ է:

Սա, իհարկե, շատ կարևոր է, եթե նկատի ունենանք վերջին օլիմպիական խաղերում ըմբշամարտիկ Միհրան Հարությունյանի նկատմամբ մրցավարների կայացրած անարդարացի որոշումը: Սենսորային պրոտեկտորները հայ թաեքվոնդոյիստներն օգտագործում են նաև մարզումների ժամանակ' միջազգային խաղերում դրանց ճիշտ և նպատակային կիրառելու համար: Կարեն Գրիգորյանի նախագահության ընթացքում ֆեդերացիան ձեռք է բերել նոր տատամիներ, որոնք ևս կարևոր են բարձրակարգ մարզումների և մրցելույթների համար: Այսօր արդեն շնորհիվ ֆեդերացիայի ջանքերի' թաեքվոնդոն մեծ տարածում ունի Երևանում, Գյումրիում, Սյունիքի, Կոտայքի, Արագածոտնի, Արմավիրի, Տավուշի մարզերում:

Հայաստանի թաեքվանդոյի ֆեդերացիան բացի պետական ֆինանսավորմամբ նախատեսված ուսումնամարզական հավաքներից, ֆեդերացիայի նախագահի գործուն աջակցությամբ, աշխատանքներ է տանում միջազգային բարձրակարգ, զարգացման բարձր մակարդակի վրա գտնվող թաեքվանդոյի ֆեդերացիաների հետ՝ այնտեղ մարզվելու և կատարելագործվելու համար: Այդ շրջանակներում հուշագիր է կնքվել Իրանի Իսլամական Հանրապետության Թաեքվոնդոյի ֆեդերացիայի հետ' համատեղ ուսումնամարզական հավաքներ անցկացնելու նպատակով: Հիշեցնենք, որ հենց Իրանն է պատրաստում աշխարհի ուժեղագույն թաեքվոնդոիստների. այս մարզաձևն Իրանում մեծ տարածում ունի: Բացի այդ, Եվրոպայի առաջնությանը նախապատրաստվելու նպատակով Վրաստանում վրացի թաեքվանդոյիստների հետ համատեղ հայ երիտասարդ թաեքվանդոյիստները մասնակցել են համատեղ ուսումնամազրական հավաքին:

Այժմ հայ թաեքվանդոյիստները պատրաստվում են նոր օլիմպիական մրցափուլին: 2018 թվականին Արգենտինայում անցկացվելիք պատանեկան 3-րդ օլիմպիական խաղերին բարձր մակարդակով հանդես գալու նպատակով Թաեքվանդոյի ֆեդերացիան համատեղ ուսումնամարզական հավաքներ է կազմակերպելու' պարսիկ, վրացի և սերբ մարզիկների հետ, որոնք, անկասկած, կտան իրենց դրական արդյունքները:

Վերջին տարիներին թաեքվանդո սպորտաձևը թևակոխել է զարգացման նոր փուլ: Այս տարի մեր մեծահասակների հավաքականը Եվրոպայի առաջնությանը նվաճեց արծաթե և բրոնզե մեդալներ, իսկ միջազգային մրցաշարում արծաթե մեդալ: Լիահույս ենք, որ հաջորդ Օլիմպիական խաղերում Հայաստանը կունենա իր մասնակիցները: Ֆեդերացիայի անձնակազմը նախագահ Կարեն Գրիգորյանի գլխավորությամբ հաջորդ Օլիմպիական խաղերի ուղեգիր նվաճելու համար պատրաստ են ներդնելու բոլոր ջանքերը, որպեսզի իրականանան բոլորիս օլիմպիական երազանքները:

Առաջիկա կայանալիք ընտրություններում քաղաքապետի թեկնածու Կարեն Գրիգորյանին մաղթում ենք հաջողություններ: Նման թեկնածուի ընտրվելը քաղաքապետի պաշտոնում կապահովի Էջմիածնի դինամիկ զարգացումն ու էջմիածնեցիների բարեկեցությունը:

Թաեքվոնդոյի ֆեդերացիայի մարզչական խորհուրդ