Գյուղում գայլերն ավելի ապահով են իրենց զգում, քան գյուղացիները

Ձմռան ամիսներին գայլերը Արագածոտնի մարզի Արագած գյուղում իրենց ավելի ապահով են զգում, քան տեղի բնակիչները: Իհարկե ասվածը մի կողմից զավեշտալի է, բայց ունի իր պատճառները։ Գյուղում չկա փողոցային լուսավորություն։ Ձմռանը, երբ շուտ է մթնում, երեկոյան գրեթե անհնար է դուրս գալ փողոց:

Այս մասին ԼՈՒՐԵՐ.com-ին հայտնեցին Արագած գյուղի բնակիչները, ովքեր նշեցին, որ այլևս հույս չունեն, որ մի օր իրենց գյուղում լուսավորության խնդիրը կարող է լուծվել։ Իրավիճակի մասին պարզաբանումներ փորձեցինք ստանալ Արագածի համայնքապետ Հենրիկ Հովհաննիսյանից, ով ասաց, որ գյուղում լուսավորված է միայն դեպի հանգստի գոտի գնացող ճանապարհը։ Հանգստի գոտին գտնվում է գյուղի մերձակայքում, ճանապարհն անցնում է գյուղամիջով։ 

«Փողոցային լուսավորության խնդիրը գյուղում ամենակարևոր հարցերից է, և մենք փորձում ենք այն լուծել: Շուտով կսկսենք զբաղվել այդ հարցով, պատրաստվում ենք ապահովել շուրջ 1 կմ ճանապարհի լուսավորություն»,- նշեց անկուսակցական համայնքապետը։ 

Գյուղացիների հետ զրույցի արդյունքում նաև պարզ դարձավ, որ Արագածի խնդիրները փողոցային լուսավորությամբ չեն սահմանափակվում։ Գյուղի ճանապարհները գտնվում են անմխիթար վիճակում, միջհամայնքային տրանսպորտի խնդիրը նույնպես ակտուալ է։ Նրանք դժգոհեցին, որ բոլոր համայնքապետերն ընտրվելուց առաջ խոստացել են լուծել այս օրհասական խնդիրները, սակայն, ինչպես երևում է, խնդիրներն առ այսօր լուծում չեն ստացել։ Հենրիկ Հովհաննիսյանի դեպքում ևս բացառություն չէ։ Վերջինս շուրջ երկու տարի է ղեկավարում է համայնքը։ 

Հիշեցնենք՝ Արագածոտնի մարզի որոշ գյուղական համայնքներում այսօր խնդիր է նույնիսկ խմելու ջուրը, խնդիր, որի պատճառով գյուղերն օրեցօր դատարկվում են:

Միքայել Նազարյան