Հիսուս Քրիստոսը գա վարչապետ՝ այս համակարգում ոչինչ չի կարող անել. ընդդիմադիր պատգամավոր

Այնպես, ինչպես իշխանությունները ներկայացում են ազգային համաձայնության կառավարությունը, ՀԱԿ-ը համարում է կեղծ գաղափար: Ըստ ՀԱԿ պատգամավոր Լևոն Զուրաբյանի՝ քաղաքագիտական պրակտիկայում ազգային համաձայնության կառավարություն նշանակվում է հետևյալը՝ ինչ-որ մի ծանր, ճգնաժամային իրավիճակում, քանի դեռ այլ ելք չկա, և մեծ անջրպետ կա իշխանության և հասարակության միջև, իշխանությունները գնում են բանակցությունների ընդդիմության հետ, և ստեղծվում է ժամանակավոր կառավարություն, որը նախապատրաստում է ճգնաժամի լուծման ուղիները: Մասնավորապես, անցկացվում է ազատ և արդար ընտրություններ: Պատգամավորը նկատում է, որ այս դեպքում նման բան չկա, ընդդիմության հետ ոչ ոք չի բանակցել, իշխանությունները չեն ընդունում առկա ճգնաժամը, այնպես որ, սա ազգային համաձայնության իմիտացիա է:

ԼՈւՐԵՐ.com-ի թղթակցի այն հարցին, թե ազգային համաձայնության կառավարությունում ՀԱԿ-ի ներկայությունը լինելո՞ւ է, Լևոն Զուրաբյանը պատասխանեց. «Բացարձակ, Կոնգրեսը կարող է գնալ իշխանություն միայն այն դեպքում, երբ մենք ունենանք մեծամասնություն պառլամենտում, և դա լինելու է մեր նպատակը 2017 թվականի ապրիլի 2-ի ընտրություններում, այլ կերպ նման բան հնարավոր չէ»:

Այն հարցին, թե ինչպես է վերաբերվում նոր վարչապետին՝ Լևոն Զուրաբյանն ասաց. «Մեզ համար ոչ մի նշանակություն չունի այս արատավոր, կոռումպացված, օլիգարխիկ, կլանային համակարգում ով է լինելու վարչապետ, այդ վարչապետի մարդկային որակները ոչ մի նշանակություն չունի. ով ուզում է լինի, Հիսուս Քրիսոտոսը գա դառնա վարչապետ՝ այս համակարգում ոչինչ չի կարող անել»: