Արսեն Բաբայանը հրաժեշտ կտա պաշտոնին

Լուրեր.com-ի տեղեկություններով՝ առաջիկայում աշխատանքից ազատվելու է ՀՀ Ազգային ժողովի լրատվական վարչության պետ Արսեն Բաբայանը։ 

Բաբայանի աշխատանքից հեռացումը կապված է ՀՀ նախագահի աշխատակազմի Հանրային կապերի և տեղեկատվության կենտրոն ՊՈԱԿ-ի տնօրեն Արա Սաղաթելյանի սպասվող պաշտոնանկությունով։ Ըստ որոշ տեղեկությունների՝ Արսեն Բաբայանը Սաղաթելյանի մտերիմն է ու համարվում է վերջինիս կադրը։ Հենց նրա շնորհիվ է Բաբայանն իր կարիերայում աճ գրանցել։ Ինքը՝ Բաբայանը մեզ հետ զրույցում ոչ հաստատեց, ոչ հերքեց տեղեկությունը. «Ապագայում սպասվող կամ չսպասվող իրադարձության մասին պտտվող լուրերի մասին կանխագուշակումներ անել չեմ կարող, չունեմ այդպիսի լիազորություն»

Ավելի վաղ աշխատանքից ազատվել էր Սերժ Սարգսյանի օգնական Սևակ Լալայանը։ Նրա փոխարեն օգնական է նշանակվել Ալեքսան Հարությունյանը, ով նախկինում զբաղեցնում էր Արգենտինայում ՀՀ արտակարգ և լիազոր դեսպանի պաշտոնը, իսկ դրանից առաջ՝ Հանրային հեռուստատեսության և ռադիոյի խորհրդի նախագահի պաշտոնը:  

Հիշեցնենք, որ Արսեն Բաբայանը եղել է արդարադատության նախարարության քրեակատարողական վարչության հասարակայնության հետ կապերի բաժանմունքի պետ, մամուլի քարտուղար, այնուհետև նշանակվել է նախարարության աշխատակազմի օրինականության վերահսկողության տեսչության իրավաբանական անձանց պետական ռեգիստրի և ոչ առեւտրային կազմակերպությունների գործունեության օրինականության վերահսկողության բաժնի պետ: Դրանից հետո Արսեն Բաբայանը եղել է Դատական դեպարտամենտի մամուլի խոսնակը։ Իսկ այժմ ԱԺ լրատվական վարչության պետ։ Ուշագրավ է, որ Սերժ Սարգսյնաի աշխատակազմում նոր նշանակվող մարդիկ երկրորդ նախագահ Ռոբերտ Քոչարյանի թիմից են: Այսինքն՝ Քոչարյանն իր թիմակիցներով վերադառնում է։ 

Քրիստինա Աղալարյան