Տեսնելով, որ չի հաջողվում ոստիկանի ատրճանակը խլել, պատվիրել է մորը՝ աթոռով հարվածել նրա գլխին

Վերջին տարիներին և հատկապես վերջին շրջանում հաճախադեպ են ոստիկանության աշխատակիցների նկատմամբ կատարված հարձակումները: Իրավակարգի պահապանների վրա ձեռք բարձրացնողներին դժվար է հասկանալ: Նրանք իսկապե՞ս չգիտեն, որ ոստիկանի նկատմամբ բռնության դեպքում քրեական պատասխանատվությունն ավելի խիստ է, քան եթե նույն գործողությունը կատարած լինեին որևէ շարքային քաղաքացու նկատմամբ: Եվ, այնուհանդերձ, երբեմն զգացմունքները, երբեմն էլ ալկոհոլը հաղթում են բանականությանը:

Քրեական գործի նախաքննությամբ պարզվել է, որ նախկինում հինգ անգամ դատապարտված Վլադիմիր Գրիգորյանը 2015թ. հուլիսի 31-ին, ժամը 16:00-ի սահմաններում, ալկոհոլ օգտագործած վիճակում, հարևանուհի Իրինա Կոստանյանի անչափահաս դուստրերին ներկայանալով նրանց մոր անունից, խաբեությամբ մուտք է գործել Ի. Կոստանյանի՝ Վանաձոր քաղաքում գտնվող բնակարան, ներսից կողպել մուտքի դուռը, արգելել երեխաների ելքը և տանը սպասել է Ի. Կոստանյանի վերադարձին:

Ըստ մեղադրական եզրակացության, նա այդ ընթացքում շուրջ 1 ժամ անհարկի բարկացել է երեխաների վրա, պահանջներ ներկայացրել, պատվիրել այս կամ այն գործողությունը կատարել իր համար: Վ. Գրիգորյանի կողմից մոտ մեկ ժամ տևած հիշյալ հարկադրական, բռնի գործողությունների արդյունքում հոգեբանական ու ֆիզիկական անելանելի վիճակ է ստեղծվել Մանան և Արփինե Ստեփանյանների համար, վերջիններս ապօրինաբար զրկվել են ազատությունից, նրանց պատճառվել է հոգեկան ուժեղ տառապանք:

Պատահմամբ բնակարան է այցելել հարևանուհի Մանե Հարությունյանը, ով Վ. Գրիգորյանի կողմից բնակարանի մուտքի դուռը ներսից բացելուց հետո, տեսել է արտասվող և իրենից օգնություն հայցող երեխաներին: Հարևանները կատարվածի մասին ահազանգել են Ի. Կոստանյանին և տարածքը սպասարկող ՀՀ ոստիկանության Լոռու մարզի վարչության Վանաձոր քաղաքի Բազումի բաժնի քրեական հետախուզության բաժանմունքին: Այդ ահազանգից հետո արդեն իր բնակարան վերադարձած Վ. Գրիգորյանը շարունակելով հանցավոր գործողությունները, չենթարկվելով ոստիկանության ծառայող Արման Ֆնդկյանի պահանջին, վերջինիս հրազենը վերցնելու և դրանով նրան սպանելու սպառնալիքներ տալով, հարձակվել է իր ծառայողական պարտականությունները կատարող իշխանության ներկայացուցչի վրա, քաշքշել, հարվածել, հրել է նրան, որի արդյունքում ոստիկանության ծառայող Ա. Ֆնդկյանը կորցնելով հավասարակշռությունը, ընկել է գետնին:

Համաձայն քր. գործի նյութերի, Գրիգորյանն օգտվելով առիթից, փորձել է վերցնել ոստիկանի հաշվեցուցակային զենքը, սակայն տեսնելով, որ դա չի հաջողվում, պատվիրել է մորը՝ աթոռով հարվածել Ա. Ֆնդկյանի գլխին: Նելլի Գրիգորյանը կատարելով որդու պահանջը, աթոռով հարվածել է Ա. Ֆնդկյանի գլխին: Վլադիմիր և Նելլի Գրիգորյանների կողմից Ա. Ֆնդկյանի նկատմամբ կիրառված բռնության արդյունքում Ա. Ֆնդկյանի առողջությանը գլխի գագաթային ձախ շրջանի, ճակատի կենտրոնական հատվածի ստորին մասի, պարանոցի աջ կողմնային մակերեսի և առաջնային մակերեսի ստորին հատվածների, ձախ նախաբազկի ստորին երրորդի հետին մակերեսի քերծվածքների, ձախից կրծքավանդակի հետին կողմնային մակերեսի արյունազեղման, փափուկ հյուսվածքների սալջարդով, գլխուղեղի ցնցման ձևով պատճաովել է միջին ծանրության վնաս' առողջության տևական քայքայումով:

Նույն քրեական գործի շրջանակում մեղադրանք է առաջադրվել նաև Վ. Գրիգորյանի մորը' Նելլի Գրիգորյանին: Մեղադրական եզրակացության համաձայն, նա 2015թ. հուլիսի 31-ին գտնվել է իր' Վանաձոր քաղաքի Ուսանողական փողոցի 4-րդ շենքի 31-րդ բնակարանում, երբ ժամը 17:00-ի սահմաններում տուն է վերադարձել որդին' Վ. Գրիգորյանը: Րոպեներ անց նույն շենքի բնակիչների ահազանգով նշված հասցե է ժամանել հիշյալ բաժնի քրեական հետախուզության բաժանմունքի օպերլիազոր Արման Ֆնդկյանը, ով տեղեկանալով, որ Վ. Գրիգորյանը հանցավոր արարքներ է կատարել նույն շենքի թիվ 32-րդ բնակարանում բնակվող անչափահաս Մանան և Արփինե Ստեփանյանների նկատմամբ, այցելել է Գրիգորյանների բնակարան և Վ. Գրիգորյանին առաջարկել է միասին գնալ ոստիկանություն: Վերջինս ընկալելով կատարած հանցավոր արարքի համար քրեական պատասխանատվության եթարկվելու անխուսափելիությունը, հրաժարվել է կատարել ոստիկանության բաժին ներկայանալու մասին ոստիկանության ծառայող Ա. Ֆնդկյանի պահանջը և կռահելով, որ իրեն բերման ենթարկելու նպատակով կարող են վրա հասնել նաև լրացուցիչ ուժեր, մորը պատվիրել է մետաղյա հենակի օգնությամբ ներսից կողպել բնակարանի մուտքի դուռը:

Նելլի Գրիգորյանը, առանց տեղյակ լինելու որդու հանցավոր նպատակներին, կատարել է նրա վերոնշյալ պահանջը, որից հետո տեսնելով բնակարանի հյուրասենյակում Ա. Ֆնդկյանի և Վ. Գրիգորյանի միջև առաջացած ծեծկռտուքն ու գոտեմարտը, որդու պատվերով աթոռով և այլ իրերով հարվածներ է հասցրել հյուրասենյակի հատակին որդու հետ ֆիզիկական պայքարի մեջ գտնվող Ա. Ֆնդկյանի մարմնի տարբեր մասերին:

Վերը նշված արարքների համար Վլադիմիր Գրիգորյանին մեղադրանք է առաջադրվել ՀՀ քրեական օրենսգրքի 119-րդ հոդվածի («Ֆիզիկական ուժեղ ցավ կամ հոգեկան ուժեղ տառապանք պատճառելը») 2-րդ մասի 1-ին, 3-րդ, 6-րդ կետերի, 133-րդ հոդվածի («Ազատությունից ապօրինի զրկելը») 1-ին մասի և 2-րդ մասի 4-րդ և 6-րդ կետերի, 137-րդ հոդվածի («Սպանության, առողջությանը ծանր վնաս պատճառելու կամ գույք ոչնչացնելու սպառնալիքը») 1-ին մասի, 147-րդ հոդվածի («Բնակարանի անձեռնմխելիությունը խախտելը») 1-ին մասի, 316 –րդ հոդվածի («Իշխանության ներկայացուցչի նկատմամբ բռնություն գործադրելը») 2-րդ մասի, իսկ Նելլի Գրիգորյանին' 113-րդ հոդվածի («Դիտավորությամբ առողջությանը միջին ծանրության վնաս պատճառելը») 2-րդ մասի 3-րդ կետի հատկանիշներով, Վլադիմիր Գրիգորյանի նկատմամբ որպես խափանման միջոց ընտրվել է կալանքը: