Մենք կկանգնենք Կարեն Կարապետյանի կողքին. մի խումբ երիտասարդներ հավաքվել են Կառավարության դիմաց (ֆոտո)

Քիչ առաջ Հանրապետության Հրապարակում՝ Կառավարության շենքի հարյուրավոր երիտասարդներ կոչ-շնորհավորանքով դիմում էին նորանշանակ վարչապետ Կարեն Կարապետյանին: Ինչպես տեղում ականատես եղավ ԼՈՒՐԵՐ.com-ի թղթակիցը, ելույթ ունեցող Գեղամ Հարությունյանն իր խոսքում ասաց, որ իրենք պատրաստ եՆ կանգնել Կարեն Կարապետյանի կողքին։

«Վերջին տարիներին մեր հասարակությունը ապրել է ՀՀ իշխանության նկատմամբ վստահության բացակայության մթնոլորտում: Իշխանությունների վարած կադրային քաղաքականության արդյունքում անհետացել էին հասարակության և կառավարության միջև անհրաժեշտ կապերն ու ընդհանուր աղերսները:

Այդպիսի պայմաններում անհնար էր վստահել կամ համագործակցել որևէ վարչապետի կամ պաշտոնյայի հետ: Սակայն Երևանի նախկին քաղաքապետ Կարեն Կարապետյանի նշանակումը վարչապետի պաշտոնում, արժանի կառավարության կազմավորման հույսեր է արթնացրել ողջ հասարակության մոտ: Հաշվի առնելով քաղաքապետի պաշտոնում նրա գործունեությունը, իր արժանապատիվ կեցվածքը, ինչպես նաև որպես վարչապետ ներկայացրած ծրագրերն ու առաջ քաշած հնարավոր լուծումները, այս ինքնաբուխ հավաքը իր վստահության ձայնն է հղում Կարեն Կարապետյանին: Միանշանակ, այս վստահությունը պիտի պարտավորեցնի վարչապետին՝ կազմելու արժանապատիվ կառավարություն, երաշխավոր դառնալ 2017թ ԱԺ ընտրությունների արդարացիության և թափանցիկության համար և արադարացնելու մեր՝ ակտիվ երիտասարդներիս հույսերը, որոնք կապվում են նրա անվան հետ:

Մենք՝ ՀՀ երիտասարդ ակտիվ քաղաքացիներս, պատրաստ ենք հենարան հանդիսանալու Կարեն Կարապետյանին՝ ապագայի հզոր և բարեկեցիկ Հայաստան կառուցելու գործում»,- իր հայտարարությունն ընթերցեց երիտասարդը։

Ելույթը կարդալուց հետո երիտասարդները ցրվեցին հրապարակից: Իսկ թե որքանով էր հավաքն ինքնաբուխ, դժվար է ասել։