Այս և այսպիսի այլ ողբերգություններ չէին լինի, եթե զորամասերում տեղադրված լինեին տեսախցիկներ

Կարելի է գրեթե համոզված ասել, որ այս հանցագործությունը, որը նաև ողբերգություն է, չէր լինի, եթե զորամասի համապատասխան վայրերում տեղադրված լինեին տեսախցիկներ, որոնցից այսօր կարելի է հանդիպել նույնիսկ փոքր խանութներում: Միանշանակ է, որ զորանոցներում ու դրանց հարակից վայրերում տեսախցիկների տեղադրման ու դրանց միջոցով հրամանատարության կողմից համապատասխան հսկողություն իրականացնելու պարագայում ծառայակիցների կողմից մեկը մյուսին սպանելու, խեղդելու, տարբեր մարմնական վնասվածքներ հասցնելու դեպքերը եթե ընդհանրապես չվերանան, ապա էապես կկրճատվեն (կից նյութն՝ այստեղ):

Քրեական գործի նախաքննությամբ պարզվել է, որ Թելման Մխիթարյանը և Խաչիկ Մինասյանը հանդիսանալով ՀՀ ՊՆ N զորամասի 1 կուրսանտական գումարտակի 1 մարտկոցի 3-րդ դասակի 2-րդ ջոկի կուրսանտներ, 2015թ. հունվարի 28-ից 29-ը Մխիթարյանն ընդգրկված լինելով որպես մարկոցի հերթապահ, իսկ Խ. Մինասյանը՝ օրապահ, ՀՀ ԶՈՒ ներքին ծառայության կանոնագրքի կանոնների նկատմամբ դրսևորել են անփույթ և անբարեխիղճ վերաբերմունք: Ըստ մեղադրական եզրակացության, նշված վերաբերմունքն ունեցել է ծանր հետևանք' նույն մարտկոցի կուրսանտներ Գ. Թևոսյանի, Ն. Սահակյանի, Վ. Սահակյանի, Մ. Ազարյանի և Հ. Բարսեղյանի միջև տեղի են ունեցել վիճաբանություն, ծեծկռտուք, ինչի արդյունքում սպանվել է Հ. Բարսեղյանը:

Վերը նշված արարքի համար Թելման Մխիթարյանին և Խաչիկ Մինասյանին մեղադրանք է առաջադրվել ՀՀ քրեական օրենսգրքի 368-րդ հոդվածի («Ներքին ծառայության կանոնագրքային կանոնները խախտելը») 2-րդ մասի հատկանիշով:

Թեև գործի նախաքննությունն իրականացրած մարմնի, քննիչի մոտեցումը խիստ է եղել՝ մեկ այլ քր. գործով սպանության մեղավորներին պատասխանատվության կանչելուց բացի, անփույթ և անբարեխիղճ վերաբերմունքի համար քրեական պատասխանատվության են կանչվել նաև մարտկոցի հերթապահը և օրապահն, սակայն սպանված զինվորի կյանքը, բնականաբար, ետ բերել հնարավոր չէ: Մեր զինված ուժերում այս հիմնախնդրի լուծումը պահանջում է արմատական ու համալիր միջոցառումներ, որոնցից առավել կարևորներից մեկը հենց տեսախցիկների տեղադրումն է զորանոցներում, զորամասերում, հնարավորության դեպքում նաև' զինվորների ծառայության այլ վայրերում: