Ինչպե՞ս զինվորական ծառայությունից խուսափած երիտասարդը բանտի «ճանապարհին» փախավ ոստիկանների ձեռքից

Քննչական կոմիտեն երեկ հայտարարություն տարածեց, որ Զինվորական քննչական գլխավոր վարչության չորրորդ կայազորային քննչական բաժնի վարույթում քննվող քրեական գործով մեղադրյալ Ա.Բադալյանը Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան տեղափոխելու ընթացքում դիմել է փախուստի, նստել իրեն փողոցում սպասող «ՎԱԶ 2121» մակնիշի ավտոմեքենան և հեռացել անհայտ ուղղությամբ:

Քննչական կոմիտեի տեղեկացմամբ՝ նրան մեղադրանք էր առաջադրվել ՀՀ ՔՕ 327-րդ հոդվածի 1-ին մասով և միջնորդություն ներկայացվել դատարան՝ նրա նկատմամբ ընտրված խափանման միջոց կալանավորումը վերահաստատելու վերաբերյալ։ Սույն հոդվածը սահմանում է ժամկետային զինվորական ծառայությունից, վարժական հավաքներից կամ զորահավաքներից խուսափելը։

Նշենք, որ սույն արարքը պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով։ Պետք է նշենք, որ հանցագործության սույն տեսակը համարվում է միջին ծանրության։

ԼՈՒՐԵՐ.com-ի հետ զրույցում ՀՀ Ոստիկանության լրատվական վարչությունից տեղեկացրին, որ ոստիկանության աշխատակիցների նկատմամբ նշանակվել է ծառայողական քննություն, որի ավարտից հետո մանրամասներ կներկայացնեն։

Քննչական կոմիտեի տեղեկացմամբ՝ Ա.Բադալյանի նկատմամբ հայտարարվել է հետախուզում: Ձեռնարկվում են անհրաժեշտ միջոցներ՝ նրա փախուստի դիմելու հանգամանքները պարզելու ուղղությամբ: