«Փաստ». Երկար տարիներ իշխանությունները «ջրի փողերով» ջուր են ծեծել

«Փաստ» օրաթերթը գրում է.

«Փաստն» իր դեկտեմբերի 2–ին հրապարակված թիվ 19 համարում՝ «Ջուր մատակարարող մասնավոր ընկերությունները գործել են պետական բյուջեից ստացվող գումարներով» հոդվածով ներկայացրել էր, որ հանրապետության ջրամատակարարման գործընթացն իրականացվել է տարբեր մասնավոր ընկերությունների միջոցով: Սակայն պարզվում է, որ դրանք որպես ՓԲԸ–ներ «փաթեթավորելով» իրականում գործել են պետության փողերով՝ մասնավորի գրպանի համար սկզբունքով:

Ստացվում է, այդ կիսապետական և կիսասեփական ընկերությունները մի կողմից պետական բյուջեից սուբսիդիայի անվան տակ գումարներ են ստացել, իսկ մյուս կողմից էլ բնակիչներից են գումարներ գանձել: Ամենաուշագրավն այն է, որ այս ընկերություններն ինչ գին ցանկացել են՝ կարողացել են «սղղացնել», իսկ իրականում մարդկանց ջրով ապահովելու ծառայություն մատուցելու գործը «կազմակերպել» են այնքանով՝ որքանով:

ՀՀ ֆինանսների նախարարության կողմից «Փաստին» տրամադրած տեղեկության համաձայն «Հայջրմուղկոյուղի», «Նոր Ակունք», «Շիրակ ջրմուղկոյուղի» և «Լոռի ջրմուղկոյուղի» ՓԲԸ–ները հանդիսացել են պետական մասնաբաժնով ընկերություններ:

««Հայջրմուղկոյուղի» ՓԲԸ–ն հանդիսանում է 100% պետական մասնաբաժնով ընկերություն, «Լոռի» ջրմուղկոյուղի» ՓԲԸ–ն՝ 85,13% պետական մասնաբաժնով ընկերություն, «Շիրակ» ջրմուղկոյուղի ՓԲԸ–ն՝ 78,18% պետական մասնաբաժնով ընկերություն և «Նոր Ակունք» ՓԲԸ–ն՝ 77,72 պետական մասնաբաժնով ընկերություն:

Ընդ որում ՀՀ կառավարության համապատասխան որոշումներով ընկերությունների կառավարման իրավունքը հանձնվել է մասնավոր կառավարչին՝ ֆրանսիական «ՍԱՈՒՐ ԷՍ ԷՅ» (SAUR S.A.) կազմակերպությանը, սակայն ընկերությունների պետական մասնաբաժնի չափը մնացել է անփոփոխ»,– ասվում է ՀՀ ֆինանսների նախարարության պատասխանում:

Ի դեպ, «Հայջրմուղկոյուղի» ՓԲԸ–ին ՀՀ հանրային ծառայությունները կարգավորող հանձնաժողովի 27.02.2009 թվականի N71–Ն որոշմամբ հատկացված սպառողների խմելու ջրի մատակարարման և ջրահեռացման ծառայությունների մատուցման սակագների հաշվարկներում բացի ընկերության սեփական եկամուտներից նախատեսվել է ՀՀ պետական բյուջեից 863,36 մլն դրամի չափով գումար տրամադրել:

Իսկ ՀՀ հանրային ծառայությունները կարգավորող հանձնաժողովի որոշումներով հաստատված ծառայությունների մատուցման սակագների հաշվարկներում ամրագրված սկզբունքներից ելնելով էլ 2015–ին պետբյուջեից փաստացի «Հայջրմուղկոյուղի» ՓԲԸ–ին հատկացվել է 2,170,687,9 հազար, «Նոր Ակունք» ՓԲԸ–ին՝ 299,609,8 հազար, «Լոռի ջրմուղկոյուղի» ՓԲԸ–ին՝ 756,892,7 հազար, «Շիրակ ջրմուղկոյուղի» ՓԲԸ–ին՝ 1,031,766,2 հազար դրամ սուբսիդիա:

Այսինքն, նշված 4 ընկերություններին պետբյուջեից ընդհանուր առմամբ տրամադրվել է 4,258,958,6 հազար դրամ գումար, որը ենթադրաբար հատկացվել է ընկերությունների կառավարման իրավունքը ստանձնած մասնավոր կառավարիչ՝ ֆրանսիական «ՍԱՈՒՐ ԷՍ ԷՅ» (SAUR S.A.) կազմակերպությանը:

Ինչ վերաբերում է այս տարվան, ապա ֆինանսների նախարարության տրամադրած տեղեկություններով՝ 07.12.2016 թ.–ի դրությամբ նշված ընկերություններից «Հայջրմուղկոյուղի» ՓԲԸ–ին հատկացվել է՝ 3,108,951,0 հազար, «Նոր Ակունք» ՓԲԸ–ին՝ 211,128,9 հազար, «Լոռի ջրմուղկոյուղի» ՓԲԸ–ին՝ 382,768,2 հազար, «Շիրակ ջրմուղկոյուղի» ՓԲԸ–ին՝ 521,851,3 հազար դրամ սուբսիդիա:

Այսինքն, 2016–ի մինչև նշված ժամկետն ընկած ժամանակահատվածը պետական բյուջեից հատկացվել է 4,224,699,4 հազար դրամ սուբսիդիա, որը հավանաբար մինչև տարվա ավարտը կհասնի նախորդ տարվա ընթացքում տրամադրված գումարին:

Անշուշտ կարելի է հաշվարկել նաև, թե նշված ընկերությունների 15–ից 22% փայաբաժնի տերերը որքան գումար են ստացել այս գումարներից: Հետաքրքիր կլինի պարզել նաև, թե՝ ֆրանսիական մասնավոր «ՍԱՈՒՐ ԷՍ ԷՅ» (SAUR S.A.) կազմակերպությանն իրականում ինչքանո՞վ է ձեռնտու եղել բազում խնդիրներ ունեցող մեր ջրային տնտեսության կառավարումը ստանձնելը կամ առհասարակ հնարավո՞ր էր նման պայմաններում ընդհանրապես երազել եկամուտ ստանալու մասին:

Այս «բարդ» մաթեմատիկական հաշվարկից իրականում պետք է փորձեն գլուխ հանել պատկան մարմինները ու նաև հանրությանը բացատրեն, թե իրականում ո՞ր ուղղությամբ կամ ո՞ւմ գրպաններն են գնացել պետբյուջեից ու բաժանորդներից գանձած գումարները:

Շարունակությունը' «Փաստ» օրաթերթի այսօրվա համարում: