Հայաստանն Իրանի հետ համագործակցելով՝ դուրս կգա՞ ադրբեջանա-թուրքական շրջափակումից

Իրանի նախագահ Հասան Ռոհանիի այցը թեև շատ կարճ տևեց, բայց այն, բնականաբար, շատ կարևոր էր: ԼՈւՐԵՐ.com-ի թղթակցի հետ զրույցում ամփոփելով Իրանի նախագահի այցը Հայաստան, ասաց ԱԺ ՀՀԿ խմբակցության պատգամավոր Վահրամ Բաղդասարյանը, ով նշեց նաև, որ այցի շրջանակներում ստորագրվեցին մի շարք պայմանագրեր, որոնք կարևոր են ինչպես Հայաստանի, այնպես էլ Իրանի համար:

«Դեռ մի քանի օր կպահանջվի այդ ամենը վերլուծելու համար, սակայն այցը բացի կարևոր լինելուց, շատ արդյուավետ էր կողմերի համար: Այն բոլոր փաստերը, որոնք վավերացվեցին, բավականին հեռանկարային են ու շատ խոսուն: Դա փաստում է նաև, որ Հայաստանն Իրանի հետ ունի հաստատուն բարեկամական կապեր, որոնք պարտավոր ենք օգտագործել, քանի որ դրա համար կա երկուստեք պատրաստակամություն»,- ասաց պատգամավորը:

Ճշտող հարցին՝ կարո՞ղ ենք փաստել, որ այսուհետ Հայաստանն, Իրանի հետ համագործակցելով, դուրս կգա ադրբեջանա-թուրքական շրջափակումից, Վ. Բաղդասարյանը հավելեց, որ դեռևս այդ մասին խոսելը վաղ է, սակայն նկատեց, որ Իրանը Հայաստանի համար բավականին վստահելի տարածաշրջանային գործընկեր է. «Իրանի հետ Հայաստանի հարաբերությունները դիտել միայն շրջափակումից դուրս գալու միջոց՝ տեղին չէ»:

Ինչ վերաբերում է տնտեսական համագործակցության հեռանկարին, ապա Վահրամ Բաղդասարյանն ընդգծեց, որ այս ոլորտում դեռ կողմերը շատ անելիքներ ունեն տնտեսական զարգացումն ապահովելու համար. «Մենք մեր հնարավորությունների միայն 10 տոկոսն ենք օգտագործում»,- եզրափակեց նա:

Արմինե Եփրեմյան