Լյովա Խաչատրյանը խնդիրներ չունի Աղվան Հովսեփյանի հետ

ԱԺ պատգամավոր Լյովա Խաչատրյանը մամուլի հրապարակումները որակում է որպես հաղորդում՝ հանցագործության մասին: Այս մասին ԼՈւՐԵՐ.com-ի թղթակցի հետ զրույցում ասաց պատգամավորը՝ նշելով, սակայն, որ ինքը տեղեկություններ չունի, թե ՀՀ քննչական կոմիտեի ղեկավարը հորդորել է, որ Ապարանում իր օգտին չքվեարկեն:

Ինչ վերաբերում է հարցին՝ եթե պարզվի, որ, այնուամենայնիվ, այդպիսի հորդոր եղել է, հնարավո՞ր է՝ ինքը միայնակ կարողանա պայքարել Աղվան Հովսեփյանի դեմ, Խաչատրյանն ասաց, որ ամեն ինչ կախված է ընտրությունների ընթացքից. «Եթե ՀՀ քաղաքացին որոշում կայացնի, որ ես պետք է ընտրվեմ, ապա՝ այո»:

Ճշտող հարցին՝ նախկինում ինքն ունեցե՞լ է խնդիր Աղվան Հովսեփյանի հետ, նա պատասխանեց՝ ոչ:

Հիշեցնենք, որ ըստ մամուլի հրապարակումների՝ ԱԺ ԲՀԿ խմբակցության պատգամավոր Լյովա Խաչատրյանը խորհրդարանական ընտրություններից առաջ հայտնվել է ոչ նախանձելի վիճակում: Նշվում է, որ Քննչական կոմիտեի ղեկավար Աղվան Հովսեփյանը պատերազմ է հայտարարել վերջինիս: Նա ջանք ու եռանդ չի խնայում, որպեսզի Լյովա Խաչատրյանը չհայտնվի ապագա խորհրդարանում:

 Արմինե Եփրեմյան