«Քարերի սիմֆոնիա»-ի շինարարությունը կասեցված է․ նախարար

ՀՀ բնապահպանոթյան նախարար Արծվիկ Մինասյանն այսօր լրագրողների հետ զրույցում անդրադարձավ  Գառնու «Քարերի սիմֆոնիա» հուշարձանի տարածքում կատարվող շինարարությանը և նշեց, որ ահազանգը ստանալու պահից սկսած՝ տեսչական մարմինը գործողություններ է ձեռնարկում. շինարարությունը կասեցված է՝ մինչեւ հստակ պարզվեն իրավական բոլոր հիմքերը:

Նրա խոսքով՝ բնության պահպանվող հատուկ տարածք են համարվում նաեւ բնության հուշարձանները. տվյալ դեպքում՝ «Քարերի սիմֆոնիան» կամ «Բազալտե երգեհոնը» համարվում է բնության հուշարձան․«Մենք մի քանի ամիս առաջ հաստատել ենք հուշարձանի սահմաններն ու անձնագիրը: Հիմա ուսումնասիրվում է, թե արդյոք կառուցվող շինությունը գտնվում է այդ սահմանների մեջ, թե ոչ: Երրորդ, եթե անգամ սահմանների մեջ չի, այն գտնվում է գետի անմիջական հարեւանությամբ, դա նշանակում է, որ գետի սանիտարական գոտու պահանջներին պետք է բավարարի:

Նախարարը նաև հավելեց, որ եթե իականացված շինաշխատանքները սպառնալիք համարվեն հուշարձանի համար, ապա կիրականացվեն որոշ միջոցառումներ։

Հիշեցնենք, որ երեկվանից մի շարք օգտատերեր ահազանգում են «Քարերի սիմֆոնիայի» մոտ բեռնատարի առկայության ու շինարարության մասին:

Իսկ ավելի ուշ՝ քաղաքագետ Հայկ Մարտիրոսյանն իր ֆեյսբուքյան էջում անդրադառնալով խնդրին, գրել էր, որ «Քարերի սիմֆոնիայի» հետ տեղի ունեցողը հանցագործություն է: