Ճանապարհային ոստիկանը՝ ծխախոտով ու առանց ամրագոտու. լուսանկար

Facebook սոցցանցում օգտատերերից մեկը զետեղել է լուսանկար, որտեղ ցայտուն երևում է, թե ինչպես է ճանապարհային ոստիկանը գտնվում ծառայողական 1153 համարանիշի ավտոմեքենայի մեջ՝ ծխախոտը ձեռքին ու առանց ամրագոտու։ 

Lurer.com-ը զրուցել է Ավտոճանապարհային ոստիկանության մայոր Դավթյանի հետ, որը պատասխանել է, թե մեքենայում ամրագոտի կրելը պարտադիր չէ ճանապարհային ոստիկանների համար։

Հղում անելով օրենքին, ըստ որի՝ կանոնավոր ուղևորափոխադրում իրականացնող ավտոմեքենաներում վարորդների ու ուղևորների, ինչպես նաև սեփական տրանսպորտային միջոցներում վարորդների համար սահմանված ծխելու արգելքի՝ Դավթյանը նշեց, որ ծառայողական մեքենայում թույլատրվում է ծխել, եթե ծխողը վարորդը չէ։

Փաստորեն, պարզվում է, որ այն, ինչ վարորդներին արգելվում է օրենքով, թույլատրվում է ճանապարհային ոստիկաններին։ Այսինքն՝ վերջիններս ապահովագրած են առանց ամրագոտի մեքենա վարելու հետևանքով առաջացած վթարներից, իսկ իրենց ծխախոտի ծուխը չի խախտում ո՛չ հասարակական կարգը, ո՛չ էլ վտանգում է ուրիշի առողջությունը։