Նախաքննական մարմինն ինքը պետք է լիներ մեղադրյալի աթոռին. Ծովինար Նազարյան

Երեկ՝ հունիսի 26-ին, և այսօր Իջեւանում կայացան Արտակ Նազարյանի մահվան գործով դատական նիստերը, որոնց ընթացքում ցուցմունքներ տվեցին ամբաստանյալներ՝ ժամկետային զինծառայողներ Հարութիկ Կիրակոսյանը եւ Ադիբեկ Հովհաննիսյանը: Տուժողի իրավահաջորդ Ծովինար Նազարյանը Լուրեր.com-ի հետ զրույցում ասաց, որ այսօրվա դատական նիստն իրենց խնդրանքով հետաձգվել է, քանի որ տուժողի իրավահաջորդի ներկայացուցիչ Մուշեղ Շուշանյանը և փաստաբան Ալվարդ Մնացականյանը ինչ-ինչ պատճառներով նիստին չեն ներկայացել:

«"Մարդու իրավուքների տուն" կոչվող միջազգային կազմակերպության ղեկավար կազմից մարդիկ էին եկել, երևի դա էլ ազդեց դրա վրա, որ դատավորը հաշվի առավ, որ Սահմանադրության 20-րդ հոդվածով մարդը իրավաբանական օգնության իրավունք ունի, իսկ ես այդ իրավունքից կզրկվեի, եթե դատավարությունը շարունակվեր»,- ասաց Ծովինար Նազարյանը:

Մեր հարցին, թե որքանո՞վ է հավանական համարում ամբաստանյալներ Հարութիկ Կիրակոսյանի եւ Ադիբեկ Հովհաննիսյանի այն պնդումները, թե իրենց բռնությամբ ստիպել են ցուցմունք գրել ու մեղքն իրենց վրա վերցնել, Նազարյանը պատասխանեց, որ լիովին հավատում է նրանց ու այդպես էլ եղել է:

«Հուլիսի 27-ին կանչել են Բերդ քաղաքի Ռազմական ոստիկանություն, իսկ մեղադրանք են առաջադրել օգոստոսի 6-ին: Երեք օրից ավելի իրավունք չունեն մարդուն անազատության մեջ պահել, բայց պահել են տասը օր: Էդ ընթացքում իրենց նկատմամբ կիրառել են բռնություններ, ջրով լի շիշ են շպրտել նրանց վրան, ծեծել են»,- նշեց Նազարյանը:

Նրա խոսքով՝ Կիրակոսյանն ու Հովհաննիսյանը հրաժարվել են ցուցմունք տալուց և նախաքննական մարնի ներկայացրած հանրային պաշտպաններից: Նազարյանի փոխանցմամբ՝ այսօր հարցաքննության ժամանակ Ադիբեկ Հովհաննիսյանն ասում էր, որ չէին վստահում ներկայացված հանրային պաշտպաններին: «Ծիծաղելի բան պարզվեց. այն պաշտպանը, ում առաջարկել են լինել Ադիբեկի պաշտպանը, մեղադրվում է խարդախության համար»,- ընդգծեց Նազարյանը: 

Մեր հարցին, թե այդ դեպքում ո՞վ պետք է լիենր մեղադրյալի աթոռին, Ծովինար Նազարյանն ասաց՝ նախաքննական մարմինը, քանր որ նրանք պետք է պարզեին, թե ովքեր են իրական մարդասպանները:  

«Նախաքննական մարմինն ինքը պետք է լիներ մեղադրյալի աթոռին իրենց կատարած կեղծ քննության, հետքերը ջնջելու, մարդկանցից բռնությամբ ու ճնշումներով կեղծ ցուցմուքներ կորզելու, իրեղեն ապացույցները ոչնչացնելու համար: Այսօր դատարանում փոխանակ անմիջապես ամբաստանյալների տված ցուցմունքների հիման վրա քննություն սկսեին նախաքննության ընթացքում բռնությունների կապակցությամբ, դրել են էդ ցուցմուքները կարդում են դատարանում, չնայած դրանցից մարդիկ հրաժարվել են դեռևս նախաքնության ընթացքում, ոչ թե այսօր»:

Հաջորդ դատական նիստը նախատեսված է հաջորդ շաբաթ՝ հուլիսի 3-ին: