Տալիս ենք զինվորներ, ստանում դիակներ. սպանված զինվորների մայրերը բողոքում են

Այսօր Կառավարության շենքի դիմաց հավաքվել էին զոհված զինծառայողների մայրերը, ովքեր պահանջում էին արդար դատաստան իրականացնել իրենց որդիներին սպանած կամ ինքնասպանության հասցրած անձանց նկատմամբ։

Ինքնասպանության փորձ արած զինվորի մայրը՝ Միքայելյան Շամիրամը, հացադուլ էր հայտարարել։ Նրա խոսքերով, իր որդին 2011 հուլիսին զորակոչվել էր ՀՀ Սիսիանի զորամաս, ուր մի ամիս շարունակ կրտսեր սերժանտ Սուրեն Միքայելյանը և լեյտենանտ Ալբերտ Խաչատրյանը նրա նկատմամբ հոգեբանական և ֆիզիկական ճնշումներ են գործադրել եւ մարտի 29-ին գազանաբար ծեծի են ենթարկել, որից հետո տղան կատարել է ինքնասպանության փորձ: Տիկին Շամիրամը փաստում է, որ տղայի մարմնի վրա առկա էին մարմնական վնասվածքներ, կապտուկներ, արյան զեղումներ։ Կինը նշում է նաև, որ տղային զորակոչել են առանց հաշվի առնելու սրտի արատի առկայության փաստը,  երբ ինքը դիմել էր տեղի պոլիկլինիկա, հայտնաբերել էր, որ այնտեղ բացակայում էին սրտի արատը հաստատող բոլոր փաստաթղթերը։

Ցուցարար կանայք շրջապատել էին Արդարադատության նախարար Հրայր Թովմասյանին և իրենց դժգոհություն էին հայտնում նրան՝ պահանջելով դատապարտել իրենց որդիներին սպանողներին։ Հրայր Թովմասյանը պատասխանել է, թե մարդիկ տարբեր պահանջներով են հանդես գալիս, ինքը պետք է նախ լիովին տեղյակ լինի բոլոր դեպքերից, որից հետո նոր կարողանա որևէ պատասխան տալ։

Այդ ընթացքում հացադուլավորի մայրը ուշագնաց եղավ, շտապ-օգնության մեքենան նրան տեղափոխեց հիվանդանոց։

Հավաքված մայրերը միաբերան բողոքում էին ռազմական դատաբժիշկ Շոթա Վարդանյանից, ով կեղծել է ոչ միայն դատաբժշկական փորձաքննության արդյունքները, այլև անմարդկային վերաբերմունք է ցուցաբերում հարազատների նկատմամբ՝ ասելով, եթե իր սեղանի վրա նվազագույնը 8 դիակ չլինի, այդ օրը բարեհաջող չի համարում։

Հադրութում ծառայող զինվոր-հետախույզ Ղազարյան Արթուրի մայրը՝ Ղազարյան Իրինան, բողոքում էր, թե ինչպես իր որդու մահվան դատաբժշկի եզրակացությունը տրվեց 105 օր հետո, իսկ մահվան հանգամանքները դեռևս անհայտ են։ Ի պատասխան իր դժգոհությունների՝ դատաբժիշկ Շոթա Վարդանյանն ասել է՝ «դե երկու տղա էլ ունես, քեզ բավական է»։

Կարճաղբյուրի զորամասում գազանաբար սպանված ծառայող Օհանջանյան Տիգրանի մահվան եզրակացության մեջ ատամնաշարը ներկացվում է ամբողջական, իսկ, ահա, մայրը վկայում է, որ բացակայում էին առջևի ատամները։ Սպանված զինվորի մայրը արտաշիրիմում կատարելու պահանջով դիմել է դատարան և դատաբժիշկ Վարդանյանից ստացել մերժում։ Մայրը փաստում է, որ դատաբժիշկը գերեզմանոցից դիակը գողանալու փորձ է արել։

Ներկաները բողոքում էին նաև պետության գերակա շահի անվան տակ մարդկանց բնակարաններից զրկվելու և միայն 20% փոխհատուցում ստանալու համար, իսկ Գագիկ Գևորգյանի մայրը բողոքում էր իր տղային դաժանաբար ծեծելու ու մեկ այլ սպանության մեղքը նրա վրա գցելու համար, ինչի արդյունքում Գագիկ Գևորգյանը դատապարտվել էր 15 ազատազրկման։