Մհեր Ենոքյանը ցուցմունք է տվել, որ գործով մյուս մեղադրյալի քույրը դեպքի պահին տանն է եղել

Սույն թվականի ապրիլի 13-ին ՀՀ փաստաբանների պալատի անդամ Վահագն Մանուկյանը ցմահ դատապարտյալ Մհեր Ենոքյանի քրեական գործում նոր երևան եկած հանգամանքները օրենքով սահմանված կարգով ուղարկել է ՀՀ վճռաբեկ դատարան ու ՀՀ գլխավոր դատախազություն: Այս մասին այսօր լրագրողների հետ հանդիպման ժամանակ ասաց ինքը՝ փաստաբանը:

Վերջինիս կողմից ներկայացված են ապացույցներ, որ 1996թ-ին նախաքննության փուլում քննիչի կողմից կատարվել են կեղծիքներ, մասնավորապես՝ իբր սպանության գործիք հանդիսացող առարկաները որպես այդպիսին ճանաչելու նպատակով հրավիրվել են ընթերակաները: Սակայն փաստաթղթեր են ձեռք բերվել, որ նրանցից մեկն առհասարակ տվյալ հասցեում գոյություն չունեցող անձ է, երկրորդն էլ ցուցմունք է տվել, որ տվյալ օրը չի եղել ոստիկանությունում: Քր. Դատավարության օրենսգրքի 426 հոդվածի երրորդ կետի համաձայն, այն է՝ դատական ակտերի վերանայման հիմքերը նոր երևան եկած հանգամանքների հետևանքով. Վերանայման է ենթակա ակտը, եթե դատական ակտով հաստատաված է փորձակետի եզրակացությամբ ակնհայտ կեղծ լինելը, ինչպես նաև իրեղեն ապացույցների, քննչական արձանագրությունների և այլ փաստերի կեղծված լինելը: Նոր երևան եկած հանգամանք է նաև Մհեր Ենոքյանի ցուցմունքը, ըստ որի գործով մյուս մեղադրյալի քույրը տանն է եղել դեպքի պահին, սակայն այդպես էլ չի կանչվել դատարան: Գործում առկա չէ նաև դատահոգեբանա-հոգեբուժական համալիր փորձաքննություն: Փաստաբանի խոսքերով, այս պատմության ամբողջ ճշմարտությունը կարող է պատմել միայն մյուս մեղադրյալի քույրը:

Հունիսի 21-ին պատասխան է ստացվել ՀՀ վճռաբեկ դատարանից, որ փաստաբան Վ. Մանուկյանի վճռաբեկ բողոքը վերադարձվում է՝ 08.06.12 որոշմամբ: Ընդամենը կես էջի վրա նշված է՝ նոր երևան եկած հանգամանքները բավարար չեն 1996թ-ի վճիռը բեկանելու համար: Իսկ Գլխավոր դատախազությունից վերջերս պատասխան է ստացվել, որ դատական դեպարտամենտից դատախազի տեղեկալի կարգադրությամբ կանչվել է Մհեր Ենոքյանի քրեական գործը, այն ուսումնասիրման փուլում է:

Հիշեցնենք, որ Մհեր Ենոքյանը ուսանել է Երևանի բժշկական ինստիտուտի ատամնաբուժական ֆակուլտետում: 3-րդ կուրսում Ենոքյանը մեղադրվել է համակուրսեցու սպանության մեջ և դատապարտվել մահապատժի, որը հետագայում փոխարինվել է ցմահ բանտարկությամբ։ Մհեր Ենոքյանն իր մեղքը չի ընդունել և արդեն 10 տարուց ավելի պայքարում է դատավճռի փոփոխման համար։