Նախարարի որոշումն անհիմն է և անընդունելի. Սուրեն Զոլյան

Այսօր ԵՊԼՀ-ի նախկին ռեկտոր Սուրեն Զոլյանը հանդիպում ունեցավ լրագրողների հետ։ Սա թվով հինգերորդ ասուլիսն է այն դեպքից հետո, երբ Կրթության և գիտության նախարար Արմեն Աշոտյանը հրաման ստորագրեց նրան պաշտոնից ազատելու մասին։ Սուրեն Զոլյանը նշեց, որ այդ իրադարձությունը դեռ վիճարկվում է և արդեն դառնում է միջազգային։ Նա հայտարարեց, որ ոչ միայն ինքը, այլև Եվրոպական Խարտիայի փորձագետների կոմիտեն անընդունելի է համարում ՀՀ կառավարության անտեղի միջամտությունն իր՝ որպես փորձագետի գործունեությանը։

ԵՊԼՀ-ի նախկին ռեկտոր Ս.Զոլյանի հայցով ՝ ընդդեմ ՀՀ ԿԳՆ անօրինականությունների, ս.թ Հուլիսի 2-ին Կենտրոն և Նորք Մարաշ վարչական շրջանների ընդհանուր իրավասության դատարանում տեղի կունենա հերթական դատական նիստը, որին ընդառաջ՝ Եվրոպական Խորհրդի Տարածաշրջանային կամ փոքրամասնությունների լեզուների եվրոպական խարտիայի փորձագետների կոմիտեն իր բոլոր անդամների անունից պաշտոնապես դիմել է ԵԽ-ի Նախարարների կոմիտեին՝ փոխանցելու իր մտավախությունը ՀՀ կառավարությանը և հիշեցնելու անդամ պետություններին իրենց պարտականության վերաբերյալ, այն է՝ հարգել փորձագետների անկախությունը և չմիջամտել իրենց աշխատանքին։ Կոմիտեն նաև ընդգծել է, որ իր գործունեության համար էական է, որ կոմիտեի անդամները պարտականություններ իրականացնելիս լինեն իրենց կառավարությունից անկախ՝ համաձայն տարածաշրջանային կամ փոքրամասնությունների լեզուների եվրոպական խարտիայի։

Սուրեն Զոլյանը հավելեց, որ ինքը հավաստի աղբյուրներից տեղեկացել է, որ ոչ պաշտոնական ձևով եղել է համապատասխան կեղծ ինֆորմացիա ԵԽ-ի կառույցի ներկայացուցիչներին և որ իր գործողությունները կապել են քաղաքական իրադարձությունների հետ, որպեսզի վերջինս չմիջամտի այս գործին։ Իսկ ինչ վերաբերում է նրա արձագանքին նախարարի որոշմանը՝ նա նշեց որ գոյություն ունի խոսքի ազատության իրավունք, և որ ինքը կարող է համարել նախարարի որոշումն անհիմն և անընդունելի։