Որո՞նք են նախաքննության շահերը

Վերջերս Ներսիկ Նազարյանը լրատվամիջոցներից մեկի հետ զրույցում հաստատել էր տեղեկությունը, որ «Հարսնաքարի» միջադեպի գործով կալանավորվածների մեջ կան ՀՀԿ-ական պատգամավոր Ռուբեն Հայրապետյանի թիկնազորի անդամներ:

Լուրեր.com-ը ոստիկանության լրատվության և հասարակայնության հետ կապերի վարչության աշխատակից Արմեն Մալխասյանից փորձեց ճշտել Ռուբեն Հայրապետյանի թիկնազորի այն անդամների անունները, ովքեր հարցաքննվել են, սակայն Մալխասյանը նշեց, որ ելնելով նախաքննության շահերից՝ անուններ չեն հրապարակվում:

Ավելացնենք, որ ավելի վաղ Լուրեր.com–ի՝ Ռուբեն Հայրապետյանին մոտ կանգնած աղբյուրները տեղեկացրել էին, որ ՀՀ ՊՆ Երևանի կայազորի հոսպիտալի քիթ-կոկորդ-ականջի բաժանմունքի պետ մայոր Վահե Ավետյանին, զինվորական բժիշկներ Արտակ Բայադյանին և Գարիկ Սողոմոնյանին ծեծի ենթարկած Գարիկ Մարգարյանը Ռուբեն Հայրապետյանի անձնական թիկնազորի անդամ է։

Մինչ այդ «Ա1+»-ին տված հարցազրույցում Երևանի ոստիկանապետ Ներսիկ Նազարյանը հայտարարել էր, թե Ռուբեն Հայրապետյանի թիկնազորը չի մասնակցել «Հարսնաքարի» միջադեպին:

Հիշեցնենք, նաև, որ ինչպես ավելի վաղ հայտնել էր Լուրեր.com-ը, մեր ունեցած տեղեկություններով՝ ՀՀ ոստիկանապետ Վլադիմիր Գասպարյանը խիստ նկատողություն է տվել ոստիկանության Երևան քաղաքի վարչության պետ, գեներալ-մայոր Ներսես Նազարյանին՝ ոստիկանին ոչ վայել պահվածքի համար։

Ենթադրաբար, նկատողության հիմք է հանդիսացել «Հարսանաքար»-ի միջադեպի վերաբերյալ Ներսես Նազարյանի պահվածքը։

Ավելացնենք նաև, որ օրեր անց, «Ա1+»-ի հարցին ի պատասխան, թե տեղեկություններ կան, որ կալանավորվածների մեջ ՀՀԿ-ական պատգամավորի թիկնազորի անդամներ կան, ոստիկանապետը պատասխանել է. «Իհարկե կան: Առաջին օրը ինֆորմացիան այդպիսին էր, վերցրեցինք նրանց, ովքեր դեպքի ժամանակ մասնակցել էին, քննության ընթացքում պարզվեց, որ նրանք էլ են, միանգամից կալանավորեցինք: Մենք առաջին օրը հնարավորություն չենք ունեցել միանգամից կարծիք կազմել, թիկնազորից էլ կան, այո»:

Հիշեցնենք, որ հունիսի 17-ի գիշերվա 23:00-ին ՀՀ ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի անվտանգության աշխատակիցները ծեծի էին ենթարկել ՀՀ ՊՆ Երևանի կայազորի հոսպիտալի քիթ–կոկորդ–ականջ բաժնի պետ, մայոր Վահե Ավետյանին, որին տեղափոխել էին «Մուրացան» զինվորական հոսպիտալ։ Վահե Ավետյանը երեկ ժամը 19.00-ի սահմաններում մահացել է:

Միջադեպի առնչությամբ հարուցվել է քրեական գործ ՀՀ քրեական օրենսգրքի 112 հոդվածի 1-ին մասով: Կալանավորվել է 6 մարդ՝ Գարիկ Մարգարյանը, Արման Բաղդասարյանը, Դավիթ Ադամյանը, Արման Խաչատրյանը, Նորայր Հայրապետյանը և Արթուր Բաբլոյանը: