Իշխանությունները ժամանակի ընթացքում կտրվում են հասարակությունից ու իրականությունից. կարծիք

Քաղաքական 22 Նոյեմբեր, 2019 12:28

ՀՀ հանրային խորհրդի ղեկավարի պաշտնը լքելուց հետո Վազգեն Մանուկյանը հիմնեց «Վերնատուն» ակումբը, որի անդամները, մեծ մասով, նախկին իշխանությունների ներկայացուցիչներ են: Նախորդ շաբաթ ակումբի առաջին նիստն էր: Նախաձեռնության նպատակների, ծրագրերի մասին ԼՈՒՐԵՐ.com-ի թղթակիցը զրուցեց ակումբի անդամ, ՀՀ քաղաքացիական ծառայության խորհրդի նախկին նախագահ Մանվել Բադալյանի հետ:

«Մեր առաջին հավաքից գոհ եմ: Նախաձեռնության ձևաչափը շատ լավն է, քանի որ մարդիկ մտքեր, գաղափարներ են փոխանակում: Հնչում են կարծիքներ, թե ինչ անել, որ մեր պետության առջև ծառացած խնդիրները լուծվեն, հին ու նոր խնդիրները կարգավորվեն հնարավորինս արագ: Ինչպես նաև, ունենալ ծրագրեր, որպեսզի ապահովենք մեր պետության առաջխաղացումը»,- նշեց նա:

Բադալյանը ընդգծեց, որ շատ ավելի լավ կլինի, որ նախաձեռնության ֆորմատը ավելի լայնանա՝ ինչո՞ւ ոչ, նաև իշխանության ներկայացուցիչները ևս ներգրավվեն այդ քննարկումներին:

«Կարծում եմ՝ հրաշալի նախաձեռնություն է, քանի որ հենց այս տարբերակով հասարակությունը կարող է համախմբվել, տարբեր քաղաքական - հասարակական բևեռներ, տարբեր հայացքների տեր մարդիկ, փորձ ունեցողներն ու երիտասարդները կարող են միևնույն թեմայի շուրջ զրուցել, հարցեր քննարկել ու որոշումներ կայացնել»,- ասաց Բադալյանը:

Մեր այն դիտարկմանը, թե հասարակությունն ի՞նչ հույսեր է կապում այս նախաձեռնության հետ, Բադալյանը դժվարացավ պատասխանել՝ մասնավորապես նշելով. «Ես, ի տարբերություն շատերի, չեմ կարող հասարակության, ժողովրդի անունից կարծիքներ հնչեցնել: Չեմ կարող ասել, որ հասարակության լայն շերտերը ինչ կարծիքի են, բայց իմ շրջապատում արձագանքները դրական էին: Մյուս կողմից՝ ինչու պետք է հասարակությունը դեմ լինի նման նախաձեռնությանը, չէ որ այս տարբերակով մարդիկ կարողանում են համախմբվել մի սեղանի շուրջ, կարծիքներ ու մտքեր փոխանակել: Առողջ հասարակությունը պետք է կողմ լինի»:

Նա նաև նշեց, որ նախաձեռնության ամենակարևոր նպատակն է քննարկումների, կարծիքների փոխանակման արդյունքում ապահովել հասարակական համախմբվածություն. «Այսինքն՝ վեր հանել այն խնդիրները, հարցերը, որոնք հուզում են բոլորիս՝ անկախ նրանից, իշխանության ներկայացուցիչ ես, թե ոչ: Նախաձեռնությունը հենց այդ ժամանակ կկայանա»:

Բադալյանի կարծիքով, նախաձեռնությունը նաև պետք է նպաստի հասարակության առողջացմանը եւ, որ իր մեծագույն ցանկությունը հենց դա է. «Ես կարծում եմ, որ մեր հասարակությունը առողջանալու տեղ շատ ունի, քանի որ մեր հասարակությունը ավելի շատ էմոցիոնալ դաշտում է, քան տրամաբանված ու խելամիտ: Մինչդեռ մեր խնդիրների լուծման համար, մեզ համար խիստ կարևոր է զգոնությունը: Մենք պետք է կարողանանաք առաջնայինը երկրորդականից տարբերել, կարևորել պետական շահը: Բացի այդ, կան պետական ու ազգային գերխնդիրներ, որոնք չի կարելի շփոթել առօրեական խնդիրների հետ»:

Զրույցի վերջում նա նաև նշեց, որ ակումբի հավաքներին իշխանական ներկայացուցիչները ևս կարող են մասնակցել. «Ես չեմ կարող ասել, կգան թե՝ ոչ, բայց ճիշտ կանեն, որ գան: Հենց իշխանությունների դժբախտությունը կայանում է նրանում, որ ժամանակի ընթացքում կտրվում են իրականությունից և հասարակությունից: Մենք տեսել ենք չէ՞ իշխանություներ, որոնք ժամանակի ընթացքում, եթե ոչ ամբողջովին, ապա գոնե իրենց շատ ներկայացուցիչների առումով իրականությունից կտրվել են, կորցրել են ոտքի տակի հողը զգալու հատկությունը: Չի կարելի մեծամտանալ և, երբ իշխանությունը մտածում է, որ ինքը անհասանելի պետք է դառնա հասարակության, մարդկանց, քաղաքացիների համար, նշանակում է, որ նա, ի սկզբանե, որդեգրել է ինքնասպանության ճանապարհը: Խոսքը ոչ միայն այսօրվա մեր իշխանության մասին է, ցավոք այդպես հաճախ է լինում»:

Լուսինե Մարդոյան