Ռուս-վրացական սահմանից ՀՀ ուղևորվող ավտոբուսում թմրանյութ է հայտնաբերվել

Կազբեկի մաքսակետի աշխատակիցները նոյեմբերի 22-ին Հայաստան ուղևորվող ավտոբուսում զննումից հետո հայտնաբերել են թմրանյութ: Այս մասին տեղեկացնում է sputnik-georgia.ru-ն՝ նշելով, որ ավտոբուսը գտնվել է ՀՀ քաղաքացի Դ. Գ.-ի հսկողության ներքո:

Իրավապահները հայտնաբերել են 149 գրամ կոկաին և 64 գրամ հաշիշ: Վրաստանի ֆինանսների նախարարությունը տեղեկացրել է, որ գործը փոխանցվել է Ներքին գործերի նախարարությանը: Հարուցվել է քրեական գործ, քրեական օրենսգրքի «ապօրինի ներմուծում Վրաստան, արտահանում Վրաստանից կամ թմրանյութերի միջազգային տարանցում» հոդվածով, ինչը ենթադրում է ազատազրկում 6-10 տարի ժամկետով:  

Ավելի վաղ Վրաստանում ՀՀ դեսպանատունը տեղեկացրել էր, որ ռուս-վրացական Վերին Լարսի անցակետի վրացական հատվածում արգելված բեռ տեղափոխելու կասկածանքով կանգնեցվել է Հայաստան մեկնող ավտոբուս։ Վրաստանում ՀՀ դեսպանությունը աշխատանքներ է տանում Վրաստանի համապատասխան մարմինների հետ՝ ավտոբուսի ուղևոր ՀՀ քաղաքացիների՝ Հայաստան արագ տեղափոխումն ապահովելու ուղղությամբ։