«Սպայկա»-ն մտնում է արցախյան շուկա

Արցախի նախագահի թեկնածու, նախկին վարչապետ Արայիկ Հարությունյանն իր էջում գրում է.

«Օրեր առաջ հաջողությամբ ավարտվել են բանակցություններս տարածաշրջանում առաջատար գյուղատնտեսական հոլդինգ համարվող «Սպայկա» ընկերության սեփականատեր, գլխավոր տնօրեն Դավիթ Ղազարյանի հետ: Եվ այսօր վստահաբար կարող եմ հայտարարել, որ շուտով այն ամբողջ ծավալով գործունեություն կիրականացնի նաև Արցախում:

Ի՞նչ կտա այն արցախցի ֆերմերին ու տնտեսությանն ընդհանրապես:

Ինչպես բազմիցս հայտարարել եմ, այգեգործության զարգացումը Արցախի գյուղատնտեսության ամենահեռանկարային ուղղություններից է, և այս իմաստով ներդրվող միջոցներն ու ջանքերը տնտեսության իրական հատվածում պետք է աճի բարձր արդյունք ապահովեն:

«Սպայկա»-ի հետ մեր պայմանավորվածությունն առաջին հերթին լուծելու է արտադրված գյուղմթերքի երաշխավորված իրացումը:

Ինչ վերաբերում է ծավալներին, նշեմ, որ ընկերության ունեցած տարեկան մթերման պահանջարկն ավելին է, քան Արցախում առաջիկա մեկ տասնամյակի համար նախատեսված է: Ուստի ծրագրերի ծավալների ընդլայնման անհրաժեշտություն կառաջանա:

Հաջորդ կարևոր գործառույթը, որ կիրականացնի «Սպայկա»-ն, սեփական արտադրական տնտեսությունների հիմնումն է՝ որպես ուղղակի ներդրում, և հողագործությամբ զբաղվողներին խորհրդատվական բարձրակարգ ծառայությունների մատուցումը:

Ինչո՞ւ հենց «Սպայկա»-ն:

Նախ՝ որևէ մտադրություն չկա դաշտը մոնոպոլիզացնելու, և այդ ընկերության մուտքը արցախյան շուկա նպատակ ունի միջազգային կարգի ստանդարտներ ներդնելու և խթանելու բարձրորակ գյուղմթերքի արտադրությունը:

Երկրորդ հանգամանքը, որ ինձ հետաքրքրել է այդ ընկերության հետ բանացություններ սկսելուց առաջ, նրա մրցունակ լինելն է:

Ծանոթ լինելով եվրոպական և իսրայելական նմանօրինակ առաջատար ընկերությունների հնարավորություններին՝ կարող եմ վստահեցնել, որ հայրենական ընկերությունը թե՛ առաջատար տեխնոլոգիաների հագեցվածությամբ, թե՛ կառավարման որակի առումով նրանց արժանի մրցակից կարող է համարվել:

Ի դեպ, «Սպայկա»-ն միայն լոգիստիկ ընկերություն չէ, այն Հայաստանում մրգի ու բանջարեղենի ամենամեծ արտադրողներից է ու խոշորագույն արտահանողը՝ դեպի Եվրոպա, ԱՊՀ և Պարսկական ծոցի երկրներ:

Պայմանների և հնարավորությունների ստեղծումը լինելու է իմ և իմ գլխավորած քաղաքական թիմի առաջնահերթ խնդիրը՝ հանուն Արցախի բարեկեցիկ ու ավելի լավ ապագայի»: