Առողջապահական համակարգում պետք է վերանայվեն մոտեցումները. բացառված չէ, որ ամեն տարի ավելի ուժեղ վիրուսի բախվենք. կարծիք

Նյարդաբան, դոկտոր-պրոֆեսոր Հենրիկ Բակունցի հետ ԼՈՒՐԵՐ.com-ի թղթակիցը զրուցեց այն մասին, թե ինչպես պետք է մարդկությունն ապրի կորոնավիրուսով պայմանավորված այս իրավիճակում և երբ կկարողանանք հաղթահարել համավարակը:

«Անհնար է ասել, թե երբ այս ամենը կվերջանա, բայց հստակ է, որ այս իրավիճակը հնարավորություն է տալիս զարգացնելու առոջապահական համակարգը: Վստահ եմ՝ հիմա ճիշտ ժամանակն է բուժման նոր մեթոդներ կիրառելու համար: Զարմանալի է, որ եվրոպական զարգացած երկրներում, ԱՄՆ-ում գրանցվում են այդքան մեծ թվով մահվան դեպքեր․ սա նշանակում է, որ պետք է վերանայել մոտեցումները առողջապահական համակարգում: Վիրուսները միշտ եղել են և դեռ կլինեն: Մենք ապրում ենք բակտերիաների և վիրուսների մեջ: Բացառված չէ նաև այն, որ ամեն տարի մարդկությունը հանդիպի մի նոր, ավելի ուժեղ վիրուսի»,-նշեց բժիշկը:

Բակունցը ընդգծեց, որ վիրուսի դեմ անպատրաստ էր ամբողջ աշխարհի առողջապահական համակարգը:

«Կորոնավիրուսով հիվանդներին տեղափոխում են ինֆեկցիոն հիվանդանոցներ, որը սխալ է, քանի որ հիվանդը ոչ թե վիրուսից է մահանում, այլ՝ ուղեկցող կամ նպաստող հիվանդություններից, օրինակ՝ ինսուլտ, ինֆարկտ, օնկոլոգիական հիվանդություններ: Այդ վիրուսը արտադրում է սպիտակուցներ, որոնք ազդում են հյուսվածքների վրա՝ քայքայելով դրանք: Տվյալ դեպքում, քայքայվում է մարդու թոքը: Զարմանալի է, բայց հիվանդների դիահերձումից հետո պարզ է դարձել, որ մարդը թոքաբոբով հիվանդ չի եղել: Թոքերը հեղուկ է լցվում, որը քայքայում է հյուսվածքները, այսինքն՝ այդ հեղուկը խանգարում է, որպեսզի թոքը իր ֆունկցիան կատարի՝ շնչի»,-ասաց բժիշկը

Բակունցի հավաստմամբ՝ դա է պատճառը, որ այսքան դժվար է պայքարել վիրուսի դեմ, քանի որ անգամ  արհեստական շնչառության սարքավորումները չեն կարող փրկել մարդուն. «Պետք է նոր մեթոդներ փնտրել, որպեսզի հեղուկը թոքերից հեռացվի, իհարկե նման աշխատանքներ արդեն իսկ տարվում են: Հույս ունենանք, որ արդյունքը շուտով տեսանելի կլինի: Մարդը չպետք է հաշտվի, որ վիրուսների մեջ է ապրում, այլ՝ պայքարի, իսկ պայքարը՝ նոր մեթոդներն են»: