Ես տիկին Մակունցի պայմանը համարում եմ անարդար և քաղաքական առումով` անիմաստ քայլ. ԼՀԿ-ական պատգամավոր

ԱԺ «Լուսավոր Հայաստան» խմբակցության պատգամավոր Սարգիս Ալեքսանյանը ֆեյսբուքյան իր էջում գրել է.

«Այսօր իշխանության ներկայացուցիչն իր առաջարկով կրկին փորձ արեց եղելությունը աղավաղել, խեղաթյուրել և դավադրության վրա հիմնվելով` քաղաքականությունը տանել իրենց ձեռնտու ուղղությամբ: Կարծես, շախմատային տրամաբանությամբ են առաջնորդվում, և, իրենց հաշվարկով, մի քայլով երկու խնդիր են ուզում լուծել. մի կողմից , շախմատային լեզվով ասած, "զոհաբերել" իրենց համար անցանկալի իրավիճակում հայտնված անձանց, իսկ մյուս կողմից՝ պառակտում առաջացնել քաղաքական հակառակորդի դաշտում: Բայց այս մարդիկ չեն գիտակցում, որ այս ամոթալի միջադեպը ոչ մեկիս հաղթանակը կամ պարտությունը չէ: Սա բոլորիս պարտությունն է, երկրի, պետականության և, մասնավորապես, ԱԺ-ի հեղինակության հարցն է:

Ես այդ խայտառակ միջադեպից ամաչում եմ, ամաչում եմ նաև իրենց փոխարեն: Մինչև հիմա մտքիս մեջ դաջվել է այդ օրվա նիստի ընդմիջումից հետո որոշ պատգամավորների հաղթական կեցվածքը, հրճվանքը, մաղձը, զզվանք հարուցող դեմքերը: Իսկապես, խղճահարություն առաջացավ իմ մեջ: Չգիտեմ` ում հաղթեցին, ինչ հաղթեցին: Իսկ հիմա այդ կատարվածից դասեր քաղելու փոխարեն խորացնում են լարվածությունը:
Իսկ տիկին Մակունցի ելույթով` իմ և պարոն Այվազյանի համատեքստում, ընդամենը փորձ արվեց Պարոն Ղալումյանի արարքը համարժեք հարթության մեջ դնել մեր երկուսիս գործողությունների հետ, ինչը առնվազն անարդար է: Նույնիսկ եթե կարողանան հասարակության մի հատվածի մոտ խաբկանք ստեղծել, միթե սա վիրավորանք չէ ամբողջ հանրությանը: Որքա՞ն պետք է ցածրանան, ի՞նչ հաշվարկներ են անում:
Հույս եմ հայտնում, որ պարոն Ղալումյանը և ականատեսները ազնվորեն կասեն ճշմարտությունը. որ ես բացի պարոն Ղալումյանի հետագա քայլերը կանխելու նպատակով վերջինիս հետ քաշելուց ( ինչի ընթացքում նա ընկավ), ոչ մի հարված չեմ հասցրել իրեն: Ամեն դեպքում, մենք գոնե հաց ենք կիսել իրար հետ. իսկ ինձ ճանաչողները գիտեն, որ ես ընկածին չեմ հարվածում:

Ես տիկին Մակունցի պայմանը համարում եմ անարդար և քաղաքական առումով` անիմաստ քայլ:
Կրկին ներողություն եմ խնդրում մեր հանրությունից բոլոր պատգամավորների փոխարեն: Սա չպետք է լիներ»: