Բազմաթիվ առաջարկներ են եղել, որոնցից հրաժարվել են. նոր մանրամասներ դրսում մնացած ընտանիքի մասին (տեսանյութ)

Երեկ ԼՈՒՐԵՐ.com-ը ռեպորտաժ էր պատրաստել 8 անչափահաս երեխաների հետ դրսում հայտնված ընտանիքի մասին: Տեսանյութի մեջ կինը նշում էր, որ տունը ստացել են մեկ տարի ժամկետով 2 տարի առաջ «Իմ Քայլը» հիմնադրամից: Մեկ տարուց հետո, չստանալով որևէ լուր ո՛չ «Իմ քայլը» հիմնադրամի և ոչ էլ բնակարանի սեփականատիրոջ կողմից, որոշել են շարունակել բնակվել, քանի որ այլ գնալու տեղ չեն ունեցել:

ԼՈՒՐԵՐ.com-ը, շարունակելով ուսումնասիրել այս ընտանիքի պատմությունը, նոր մանրամասներ Է պարզել:

Մենք կապ ենք  հաստատել գործարար Գրիգոր Տեր-Ղազարյանի հետ, ով մի շարք այլ գործարարների հետ միասին, շուրջ մեկ տարի է՝ համագործակցում է «Իմ քայլը» հիմնադրամի հետ և օգնում անապահով ընտանիքներին՝ բնակարանի ձեռքբերման և այլ խնդիրների լուծման համար:  Մեզ հետ զրույցում Գրիգոր Տեր-Ղազարյանը նշեց, որ Քրիստինե Մամոյանի ընտանիքը այդ անապահով ընտանիքներից մեկն է:

«2 տարի առաջ մենք ընտանիքին տրամադրել ենք բնակարան, արել ենք այն ամենը, ինչը հասնում էր մեզնից: Նախնական պայմանավորվածությամբ՝ ընտանիքը պետք է այդ բնակարանում  ապրեր 1 տարի: Ժամկետը լրանալուց հետո, խնդրել են ևս մեկ տարի ապրել բնակարանում և իրենք ընդառաջել են այդ խնդրանքին»:

Գրիգոր Տեր-Ղազարյանը հերքեց այն տեղեկությունը, թե առանց նախապես տեղեկացնելու և ժամանակ տրամադրելու, պահանջել են ազատել բնակարանը:

Երկու տարին լրանալուց հետո, մեկ ամիս առաջ ընտանիքի հետ կապ են հաստատել և  խնդրել են ազատել բնակարանը:

«Այս ընթացքում ընտանիքին եղել են մի շարք առաջարկներ թե՛ մեր և թե՛ հիմնադրամի կողմից: Նրանց տարբեր բնույթի աշխատանք ենք առաջարկել, անգամ տվել ենք  աշխատանքի վերապատրաստման հնարավորություն, սակայն իրենք որևէ կերպ չեն ցանկացել համագործակցել և մերժել են բոլոր առաջարկները: Իրենք, կարծես, ավելի կոմֆորտ կյանքի էին ձգտում, որի բավարարումը մեր ֆունկցիաների մեջ չի մտնում: Կան շատ այլ ընտանիքներ, որոնք այս օգնության կարիքը ավելի շատ ունեն»:

Գրիգոր Տեր-Ղազարյանը հավելեց, որ իրենք են որոշել, որ ընտանիքը պետք է լքի բնակարանը, որպեսզի այնտեղ մեկ այլ ընտանիք բնակվի:

Տեղի ունեցած միջադեպին անդրադարձել է նաև «Իմ քայլը» հիմնադրամը՝ պարզաբանում ներկայացնելով Քալաշյան-Մամոյան ընտանիքի շուրջ ստեղծված իրավիճակի մասին:

Պարզաբանման մեջ նշված է, որ հիմնադրամի կողմից ընտանիքին առաջարկվել են տարբեր կացարաններ եւ աշխատանքներ, որոնցից հրաժարվել են:

Անի Հակոբյան