Կինն է իր մարմնի տերը, և ինքը պետք է որոշի՝ կցանկանա՞ աբորտ անել, թե՞ ոչ

ԱԺ առողջապահության և սոցիալական հարցերի մշտական հանձնաժողովում մի խումբ փաստաբանների կողմից ներկայացվեց «Չծնված երեխայի կյանքի իրավունքի մասին» օրենքում փոփոխություններ կատարելու նախագծերի փաթեթ:

Ըստ փաստաբան Ներսես Իսաջանյանի առաջարկածի՝  Հայաստանում պետք է արգելվեին հղիության արհեստական ընդհատումները (աբորտները)՝ բացառությամբ այն դեպքերի, երբ հղիությունն իրական վտանգ է ստեղծում կնոջ կյանքում։

Սակայն, չընդունելով բերված նախագծերում ներկայացված դրույթների իրավական կողմերը, հանձնաժողովի նախագահ Նարեկ Զեյնալյանը հանրագրի հարցը դրեց քվեարկության, որը մերժվեց միաձայն:

Չնայած նրան, որ ԱԺ-ն միաձայն մերժեց ներկայացված առաջարկությունը, այնուամենայնիվ աբորտների արգելքի հարցին անդրադարձավ նաև ԱԺ ԲՀԿ-ական պատգամավոր Նաիրա Զոհրաբյանը, որը ֆեյսբուքյան գրառմամբ հայտնել է, որ ինքը և իր գործընկեր Շաքե Իսայանը առաջիկա օրերին շրջանառության մեջ  կդնեն չծնված երեխայի կյանքի իրավունքի մասին օրենքի նախագիծ, որով կարգելվի հղիության արհեստական ընդհատումը, բացառությամբ, եթե բժիշկների ցուցումով կինն ունի այնպիսի առողջական խնդիրներ, որոնք անհամատեղելի են հղիության հետ։

Թեմայի շուրջ ԼՈՒՐԵՐ․com-ը զրուցել է «Իրավունքի ուժ» հասարակական կազմակերպության համահիմնադիր  Արման Ղարիբյանի հետ, որը հետընթաց քայլ որակեց Հայաստանում աբորտի հնարավոր արգելքը․ «Հայաստանում ամեն տեսակի աբորտ արգելելը, կարող եմ ասել, մեծագույն հետընթաց է։ Աբորտ անելը կնոջ իրավունքն ու ազատությունն է: Կինն է իր մարմնի տերը, և ինքը պետք է որոշի՝ կցանկանա՞ աբորտ անել, թե՞ ոչ»,- նշեց Արման Ղարիբյանը:

Ըստ նրա՝ որևէ մեկին պետք չէ պարտադրել դառնալ ծնող. «Ոչ ցանկալի կամ պատահական հղիության դեպքում կնոջը արգելել աբորտ անել, նշանակում է՝ նրան պարտադրում և հարկադրում են դառնալ ծնող: Իսկ հարկադրաբար ծնող դարձածը, երբեք չի կարող լինել լավ ծնող և երեխայի մասին լավ հոգացող մայր»,- ընգծեց նա:

Փաստաբանների կողմից առաջարկված «Չծնված երեխայի կյանքի իրավունքի մասին»  օրենքի փոփոխության վերաբերյալ Արման Ղարիբյանը նկատեց 2 խնդիր. «Առաջին խնդիրը կնոջ ազատությունն է և իր մարմնի նկատմամբ իշխանության կորուստը: Երկրորդը՝ երեխայի ապագայի խնդիրը, որ ինքը ոչ ցանկալի է և չի ունենալու մայր, որն իրեն կսիրի»,- ասաց նա:

Մեր զրուցակիցը այն կարծիքին է, որ վերոնշյալ առաջարկության ընդունումը Հայաստանում կարող է ավելացնել կոռուպցիոն ռիսկերը. «Փորձը ցույց է տվել, որ այն երկրներում, որտեղ արգելված են եղել աբորտները, կանայք այնտեղ միշտ զարտուղի ճանապարհների են դիմել: Այսինքն` դա պարզապես ավելացնելու է ոչ ապահով պայմաններում աբորտների քանակը և պատճառ է դառնալու կոռուպցիոն դեպքերի ավելացման: Շատ երկրներում թույլատրում են աբորտն այն պատճառով միայն, որ կանայք անապահով պայմաններում դա չանեն, քանի որ այն կարող է վտանգել նրանց կյանքը:  Եթե կինը ցանկանում է ազատվել երեխայից, միևնույն է, նա դա կանի»,- եզրափակեց Արման Ղարիբյանը:

Զվարթ Պետրոսյան 

Այս թեմայով Տղամարդն ընկերուհու աբորտից հետո հրդեհել է ընտանիքի պլանավորման կլինիկան Մեկ օրում բացահայտվել է 58 հանցագործության դեպք. թմրանյութեր, խոշտանգում, ապօրինի աբորտ ԱՄՆ-ում 12-ամյա աղջիկը խորհրդարանում բուռն ելույթ է ունեցել՝ ի պաշտպանություն աբորտի «Բացառում եմ ինքնասպանության վարկածը, մահացած զինվորի մարմնի վրա բռնության հետքեր են հայտնաբերվել». մանրամասներ «Ադրբեջանը անհնագստացած է Հայաստանում տիրող գործընթացներից. չի ցանկանում իշխանափոխություն»