Մարդասպանությունից արյունահեղություն․ Եղեգնուտ համայնքի բնակիչները պահանջում են լուծել երկու գյուղապետ ունենալու խնդիրը

«Զոհվածի փող ուտող» , «Հեռու մեզանից» , « Ոչ հնի վերադարձին» , « Վստահում եմ միայն վարչապետին» , -այս կարգախոսներով այսօր կառավարության դիմաց են հավաքվել Եղեգնուտ համայնքի բնակիչները, որոնք բողոքում են, որ այս պահին իրենց գյուղը երկու գյուղապետ ունի, պահանջում են, որպեսզի իրենց հանրապետական գյուղապետը դուրս գա պաշտոնից։ Նշենք, որ հենց այսպիսի ակցիաների ճնշման ներքո էր, որ գյուղապետը  հրաժարվեց իր պաշտոնից, սակայն որոշ ժամանակ անց արդեն փոշմանել է և կրկին որոշել է գյուղապետ դառնալ։

« Հնարավորա մինչև մարդասպանություն, արյունահեղություն, որովհետև արդեն 34 տարի էս բնակիչները կշտացած են, մարզպետը թալանչի նախկին գյուղապետին անօրինական ձևով ուզում ա խցկի գյուղապետարան»։ Այս մասին այսօր լրագրողների հետ զրույցում հայտարարեց բողոքող գյուղացիներից մեկը։ 

« Օրենք չկա, օրենքով ավագանին չի կարող անվստահություն հայտնել, ինքը իր դիմումի համաձայն ազատվել ա, տարի ու կես հետո փոշմանել ա, եթե ուզումա աշխատի՝ խնդրում ենք ընտրություն տեղի ունենա արդար ձևով» , ասաց բողոքող մեկ այլ գյուղացի, որը նաև ավագանու անդամ է։ 

Նշենք, որ այս ողջ ընթացքում գյուղը ունեցել է գյուղապետի ժամանակավոր պաշտոնակատար, և քանի որ նախկին գյուղապետը ցանկանում է վերադառնալ, այնպես է ստացվել, որ գյուղն ունի երկու գյուղապետ։

Գյուղացիները պատմում են, որ նախկին հանրապետական գյուղապետը վերցրել է տարածք, որոշել դարձնել գյուղապետարան, նոր կնիք է վերցրել։ Գյուղացիները ցանկանում են, որպեսզի Նիկոլ Փաշինյանը հանդիպի իրենց հետ, ի վերջո հասկանան՝ ինչպես է իրենց խնդիրը լուծվելու, նաև նշում են, որ մարզպետի աջակցությունը վայելում է հանրապետական նախկին գյուղապետը։  600 ավելի ստորագրություն են հավաքել ու դիմել կառավարությանը, սակայն արձագանք այդպես էլ չեն ստացել։